"Iha governu ida Primeiru Ministru kontinua iha funsaun to'o governu foun tomada-de-pose", dehan nia, iha edifísiu Ministériu Solidariedade Sosiál Inkluzaun (MSSI), Kaikoli, Tersa (25/2).
Laureadu Nobel Pás ne'e afirma, Primeiru Ministru hatama ona demisaun maibe nafatin funsiona, tanba dalan normál tuir Konstituisaun RDTL.
Nune'e, agora hein de'it desizaun husi partidu polítiku neen (6) ne'ebe forma ona koligasaun atu aprezenta lista governu foun nian, hafoin haree desizaun saida mak sei mosu mai.
Antes ne'e, Primeiru Ministru, Taur Matan Ruak, hatama karta ona demisaun no daudaun ne'e hein deit Prezidente Repúblika atu dekreta.
"Ha'u hatama karta ida, manifesta ba ha'u-nia demisaun," dehan PM Taur, iha Palásiu Prezidensiál, Bairru-Pité,Tersa (25/2).
Eis-Jeneral akresenta liután, karta demisaun ne'ebé hatama validu bainhira Prezidente Repúblika dekreta tuir Konstituisaun.
"Pedidu demisaun ne'e validu kuandu Prezidente dekreta ona, enkuantu seidauk ha'u kontinua nu'udar Primeiru Ministru," Taur akresenta.
Antes ne'e mós, Prezidente Repúblika, Francisco Guterres Lú Olo hatete, Taur Matan Ruak kontinua asume kargu Primeiru Ministru tanba VIII Governu nafatin iha plena funsaun normál, no Governu ida laiha bainhira Primeiru Ministru hatama karta demisaun tuir Konstituisaun RDTL 112. (*)