Hafoin hasoru malu ho PR, Sekretariu Jeral Partidu CNRT, Francisco Kalbuadi Lay ko'alia ba midia iha palasiu PR, Dili (23/01)
Foto Midia PR
Tempotimor (Dili) - Maske Partidu Consello Nacional Reconstrução Timor-Leste (CNRT) vota absteinsaun no kontra OJE 2020 maibe sei konsidera nafatin ezistensia bloku Aliansa Mudansa ba Progresu (AMP).
Sekretariu Jeral Partidu CNRT, Francisco Kalbuadi Lay hatete, mezmu Primeiru Ministru, Taur Matan Ruak, deklara AMP laiha ona maibe juridikamente sei eziste tanba bloku koligasaun nee forma liuhusi konferénsia.
"Tuir juridiku eleitoral AMP harii husi konferensia no laiha mós tenke husi konferensia", dehan Sekretáriu Jerál CNRT, Francisco Kalbuadi Lay, iha Palásiu Prezidensiál, Bairru-Pité, Kinta (23/1).
Nia esplika, formasaun AMP liuhusi konferensia rua, ida konferensia interna partidu nian hafoin lori fali ba konferensia nivel bloku koligasaun.
Antes ne'e, Primeiru Ministru, Taur Matan Ruak, ne'ebé mós nu'udar Porta-vós AMP deklara katak AMP la eziste ona, hafoin Orsamentu Jeral Estadu (OJE) tinan fiskál 2020 la pasa iha Parlamentu Nasional. (*)
Tempo Timor
Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.
Jornalista Jornal Tempo Timor, bandu atu hetan envelope ka sasan ruma husi fontes informasaun sira.
www.tempotimor.com
