Ministru Justisa, Manuel Carseres hatete, orsamentu duadesimu bele ba de'it funsionamentu mákina estadu nian,  la kobre ba programa foun tinan 2020 nian.

"Programa foun ne'ebe ita prepara ba tinan 2020 nian, maibé sei pending tanba orsamentu seidauk iha", dehan nia, iha Palásiu Governu, Kuarta (22/1).

Governante ne'e afirma, orsamentu duadesimu agora bele ba kategoria hanesan saláriu vensimentu no bens servisu de'it, maibé ba kapitál menór no kapitál dezenvolvimentu laiha.

Nia akresenta, ho orsamentu dudesimu, mákina ministériu la'o normál nafatin, nune'e atendementu ba públiku la'o di'ak hanesan baibain.

Alokasaun OJE tinan fiskál 2020 ba MJ hamutuk tokon $18.253 ne'ebé fahe ba verba saláriu no vensimentu tokon $5.17, bens servisu tokon $12.271, tranferénsia públika $-, kapitál menór rihun $671, no kapitál dezenvolvimentu rihun $194.

Husi deskrisaun ne'e rasik hatudu alokasaun OJE 2020 ba saláriu no vensimentu no mós bens servisu boot liu kompara ho kapitál dezenvolvimentu no kapitál menór hodi implementa programa MJ nian rasik. (*)