"Ha’u sente kontente no ba dala-uluk hanesan Xefe aldeia ida hetan konvite hodi akompaña Xefe Estadu, mai vizita estadu iha rai-liur", dehan nia hafoin termina envolve atividade vizita xefe estadu ba Singapura, Domingu (11/12).

Nune’e, apresia tebes ba polítika xefe estadu nian ne’ebé fo mos oportunidade ba autoridade lokal sira hodi ba haree rai dezenvolvidu sira seluk.

Husu ba Prezidente Repúblika kontinua nafatin ho politika ida-ne'e atu bele lori mos autoridade lokál sira seluk akompaña ba vizita iha rai liur.

Prezidente Repúblika (PR), José Ramos Horta, hatete, konvida Xefe Aldeia 03 Fatukama, Lúcia Araújo, inklui seguransa sivíl na'in-ida no joven na'in-ida husi Postu Administrativu Lekidoe hodi akompaña vizita xefe estadu ba Repúblika Singapura.

“Ha’u konvida mos xefe aldeia 03 Fatukama (Metiaut), seguransa sivíl ida ne’ebé kleur ona iha ha’u nia rezidénsia inklui jóven ida husi Lekidoe, Aileu, ha’u sei halo nune’e nafatin, lori autoriedade lokál iha territóriu nasionál hodi koñese liu tan servisu Prezidente Repúblika iha rai-liur no halo komparasaun entre rai rua”, nia dehan

Politika ne’e, la’ós ba de’it autoridade lokál, maibé bele akontese mos ba manorin ka negosiante ambulante ida konforme rai ne’ebé besik.

Tanba, atividade vizita estadu sempre akompaña husi deputadu sira, atu hatudu katak, deputadu sira kontinua akompaña direta vizita estadu, bele apoia nafatin Xefe Estadu nia atividade no harii konsensu entre instituisaun soberanu.

Durante iha Singapura, sidadaun na’in tolu, akompaña vizita offisiál ba Palásiu, hodi hasoru malu ho Prezidente Reúblika no Xefe Governu repúblika Singapura inklui jantar estadu no vizita bá instalasaun projetu transformasaun bé fo’er ba mineral. (*)