"Atu hatan lalais de'it, ha'u laiha objesaun, atu hasai osan, plenaria sobernu, maibé ha'u konvida ita hotu distintu deputadu sira, ita reve, mai ita haree fila-fali polítika atu fasilita transporte ba deputadu sira, ida sosa kareta ne'e, ne'e polítika ida ne'ebé sala tiha ona, ha'u ho konkorda ho ema, estudante ho joven sira agora halo manifestasaun ne'e", dehan nia liuhusi debate jeneralidade loron datoluk ba proposta lei OJE 2023 iha plenária PN, kuarta (9/11).

Tanba ne'e, depende ba deputadu sira atu hato'o proposta alterasaun iha deskusun no aprovasaun iha faze espesialidade, nune'e bele hasai tiha osan sosa kareta 35 ninian.

Tanba, Prezidente PN mós ko'alia bebeik ona katak, PN laiha kestaun kona-ba atu hasai ka hatama osan ba sosa kareta nian, maibé parese agora ne'e to'o ona tempu atu Parlamentu haree fali hodi revee politika oinsa atu fasilita transporte ba deputadu sira.

Politika Governu daualu nian, hakat tiha ona ba politika ida la fasilita kareta ba kargu xefia sira, maibé atribui de'it mak subsidiu transporte, maibé parlamentu seidauk iha politika ida ne'e, tanba iha Lei estatutu deputadu hatete, deputadu sira iha diretu ba transporte, la signifika tenke hetan kareta.

Politika sosa kareta ne'e, Fretilin rasik mos kontra wainhira iha eis prezidente PN, Vicente Guterres nia mandatu, segunda lejislatura, maibé ho interpretasaun oioin katak, diretu ba transporte, entun ikus mai sosa duni kareta.

Tuir loloos diretu ba transporte ne'e, la signifika tenke sosa kareta ba deputadu, maibé agora sosa tiha ona kareta, ida-ne'e mak ohin loron sempre hamosu problema hela de'it wainhira PN propoin atu sosa kareta.

Tanba ne'e, husu deputadu hotu, tenke haree fali politika ida-ne'e no prefere atu la'o tuir governu ninia polítika, define subisidiu transporte ba deputadu, maibé ho montante ne'ebé razoavel.

Tanba, asaun sosa kareta ne'e, nafatin sai problema hela de'it, hahú kedas akizasaun ne'e problema tiha ona, aumenta despeza boot, hahú kedas iha segundu lejislatura.

Tanba, iha momentu ne'eba, osan tau ba sosa kareta prado, maibé sosa fali pajero, ida-ne'e mos sei problema to'o lori malu ba tribunal.

Kazu ne'e akontese iha Eis Prezidente PN, Vicente Guterres nia mandatu no la sala tribunal mos absolve ona kazu ida ne'e iha tinan rua ka tolu liubá relasiona ho prosesu akizasaun ba kareta pajero ne'ebe deskonfia iha indisiu ba korupsaun.

"Depois kareta pajero ne'e la to'o tinan lima halo leilaun, mais manifestasaun ida laiha to'o agora", nia afirma.

Nia hatete, kada tinan despeza sempre aumenta, tanba selu motorista parlamentu desde segunda lejislatura ne'e, motorista simu US$300 kada fulan.

Nune'e mos, Deputadu sira hetan subsidiu kombustivel kada fulan, despeza ne'e osan hotu, tinan hirak liubá komesa iha tán subsídiu foun kada tina, valor US$1.250 no subsidiu manutensaun kategoria A nian, kuaze aloka osan rihun US$1 kada tinan.

Manutensaun ho kategoria B mos iha problema liután, tanba kareta nia buat ki'ik oan ida mal at mos lori ba benkel hadi'a, loron rua at fali de'it, mais kustu ne'e ejazeradu.

"Projetu sira ne'e despeza hira, satán kareta foun de'it mos lori ba benkel", nia afirma. (*)