“Atu dehan de'it horseik hasoru malu ho Ministru MENKO Polhukam no Ministra Negosiu Estranjeiru Indonézia, Retno Lestari, ami hasoru malu oras ida, klaru iha asuntu sira hanesan ne'e sempre ita dehan katak diferensa ne'e iha, maibé antes atu sai ami konkorda katak sei iha tempu atu hasoru malu filafali”, dehan Xanana iha Aeroportu Internasionál Prezidente Nicolao dos Reis Lobato, Komoro, sesta (09/09).

Ba pedidu ida-ne'e Timor-Leste kompriende tanba Ministra Retno dadauk okupadu liu ho servisu G-20 ida-ne'e la'ós buat ki'ik, no la'ós ASEAN mais G-20 boot tebtebes, tanba ne'e sira iha preparasaun fulan-ida fulan-rua tán ne'e sei okupadu tebes.

Maibé buat ki'ik ne'ebé ko'alia mak ida-ne'e, sempre iha frankeza, onestidade ho buat sira seluk no ida-ne'e sei labele ko'alia sai ba públiku, tanba asuntu ne'e internál.

“La'ós de'it Ministra mais Ministru mós ita hotu hatene, mós okupadu, ne'ebé ita tama ho tama Ministu dehan loos, enkontru foin dadauk ne'e entre Prezidente rua pois ha'u mós ko’alia dehan sim, ida-ne'e sai prioridade mais tanba iha asuntu”, esplika nia.

Pozisaun Timor-Leste nia kompriende tanba bainhira Timor-Leste rezolve problema fronteira marítima ho Austrália, no Timor-Leste rasik husu ba Indonézia atu suspende lai diskusaun fronteira entre Timor-Leste ho Indonézia.

Iha momentu ne'ebá Indonézia rasik aseita, entaun agora Timor-Leste mós tenke kompriende ho pedidu Indonézia nian tanba agora sira sei foku hela ho servisu G-20.

“Buat ne'e la'ós ba hasoru malu de'it, buat ne'e problema ekonómia, problema polítika, problema oioin iha mundu, funu, ne'ebé ita mós tenke kompriende katak ita sei presiza tan tempu oituan”, hatete nia. (*)