“Sim, ita iha free viza ba sira, e sira mai sira free tanba ita fó free, maibé ita ba sira la free tanba iha problema COVID-19 entaun sira revee fila fali sira-nia lei, maibé ha'u sente iha tempu badak sei iha anunsiu ruma ba free viza, entre ita ho sira”, dehan Ministra Adaljiza, bainhira hasoru malu ho Primeiru Ministru (PM), Taur Matan Ruak, iha Farol, kuarta (31/08).
Ministra informa, Estadu Timor-Leste fó vistu livre tanba Timor-Leste adopta sistema demokrátika ne’ebé iha obrigasaun fó liberdade ba ema hotu atu tama ka vizita.
“Iha mundu ne’e nasaun ne’ebé adopta sistema demokrásia ne’e ema livre tama, ne’ebé ita-nia nasaun ne’e ema barak vizita ne’e di’ak liután, nune’e ita tenta atu fó vistu livre ba sidadaun sé de’it”, afirma nia.
Maibé Estadu Timor-Leste fó de’it vistu livre ba nasaun ne’ebé halo ona akordu katak entre sidadaun nasaun rua vizita ho livre viza.
Entretantu, nasaun ne’ebé fó vistu livre ba sidadaun Timor-Leste mak hanesan nasaun-sira ne’ebé membru Uniaun Europeia (UE) tanba Governu halo ona akordu.
“Nasaun sira Uniaun Europeia ne’e tanba ita iha akordu sira mai ita-nia livre viza, ita ba fali sira-nian mós livre viza”, hatete nia. (*)