Tanba ne’e, Prezidente Partidu CASDT, Gilson Osorio Alves akompaña husi estrutura nasionál konsege fó posse dahuluk ba estrutura Partidu iha Rejiaun RAEOA, sub-rejiaun Pantai Makasar, Suku Lalisuk.

Militante sira ne’ebé simu pose sente kontente no preparadu servisu ba eleisaun parlamentár ne’ebé sei akontese iha tinan 2023.

Iha Ssermónia simu toma de posse ne’e prezide husi Prezidente Partidu CASDT, Gilson Osorio Alves, hamutuk ho konselleira, Adjuntu Sekretária Jerál, Vise Prezidente, no komisáriu politika nasionál, nian ba membru estrutura munsípiu ema 55 ho militan kuaze atus-ida-resin, membru estrutura munisípiu ho militante sira ne’e, kompostu husi postu administrativu, Pante Makasar, Nítibe, Pasabe, ho Oe-Silu.

Hafoin fó posse ba Estrutura RAEOA, Konsieleira Partidu CASDT, Aida Maria Da C.Osorio Soares hatete, nia parte hakarak hatutan no hakbi’it  nafatin misaun no vizaun ne’ebé konsagra ona  iha livru programa politik CASDT nian ba futuru ida di’ak liután.

Maske feto maibé iha mós responsablidade morál hodi kontribui ba dezenvolvimentu, tanba ne’e husu ba militante partidu atu la’o hamutuk ho ema hotu.

“Presiza la’o mós ho fuan ho domin, atu nune’e ita mós bele sente ita-nia povu sira-nia preokupasaun ne’ebé durante ne’e sira hasoru, mai ita hamutuk la’o ho fuan ho domin lori CASDT hetan vitória iha elisaun parlamentar iha 2023”, afirma Konselleira ne’e.

Adjuntu Sekretáriu Jerál Partidu CASDT, Armando Alves hatete, militante sira, lalika monu bebeik ba ema nia lasu politika, ne’ebé bobar lia bosok hodi hanehan povu.

“Imi fó tiha imi-nia apoiu to’o ikus laiha ema ida husi Partidu ida atu rekoñse ita-boot sira-nia votu ne’ebé apoiu sira iha eleisaun, tan ne’e ha’u husu ba ita-boot sira, mai hamahon-an iha centru ASDT ita hamutuk servisu maka’as lori CASDT reprezenta povu nia lian iha Governu’, deklara nia.

Vise Prezidente CASDT, Paulo Valente Duarte ba estrutura katak, sira ne’ebé toma de posse nu’udar opportunidade maibé mós responsablidade oinsá atu hala’o kna’ar husi Postu, Suku to’o nível aldeia.

Tanba ne’e rekomenda ba estrutura munisípiu sira atu servisu ho fuan ho domin ho lia los, labele promete falsu ba  povu sira iha baze, maibé loke fuan no domin hodi akumula povu.

Prezidente Partidu CASDT  RAEOA,  José Luis Da Costa hatete, nia parte prontu atu servisu maka’as iha Oekussi, ho nia estrutura tomak nune’e atu lori Partidu CASDT ba kompete iha eliusaun parlamentar 2023.

Komisário Polítika , Norberto Saturnino Rodrigues esplika, Partidu CASDT maske ki’ik tanba seidauk ukupa Governu maibé iha responsablidade morál ba povu. (*)