Delegasaun ne’ebé lidera husi Membru Parlamentu Europeu (MPE) no Xefe Misaun, Domènec Ruiz Devesa, ne’ebé to’o iha Dili, segunda (11/07) hodi entrega relatóriu finál sira husi obervasaun eleisaun prezidensiál iha Timor-Leste ne’ebé realiza iha loron 19 marsu ho segunda volta iha 19 abril 2022.

Iha relatóriu ne’ebé entrega ba Governu Timor-Leste inklui mós lista rekomendasaun sira hodi hadi’ak eleisaun ba futuru.

Xefe misaun Ruiz Devesa mós sei halo sorumutu hamutuk ho autoridade no reprezentante husi instituisaun timoroan sira, órgaun jestaun eleitorál, Tribunál Rekursu, partidu polítiku sira no sosiedade sivil, hodi bele fahe opiniaun kona-ba konteúdu relatóriu finál no buka dalan sira oinsá bele implementa rekomendasaun sira.

“Ami mai fali Timor-Leste ho relatóriu finál ne’ebé prodúz liu tiha eleisaun sira. Relatóriu ida-ne’e iha rekomendasaun prioritária sira bazeia ba obrigasaun no kompromisu internasionál sira, rejionál no nasionál kona-ba realiza eleisaun demokrátika sira ne’ebé Timor-Leste asina hodi bele halo reforma luan no permanente, tuir espetativa husi povu timoroan”, dehan Ruiz iha Ótel Timor, segunda (11/07).

Haree ba rekomendasaun ne’ebé konsidera prioritária iha relatóriu finál husi Misaun Observasaun Eleitorál Uniaun Europeia nian bá Timor-Leste 2022, mak tau hamutuk lejislasaun eleitorál tomak iha Kódigu Eleitorál ida ne’ebé konsistente no ho unifikasaun, hamutuk ho respetivu regulamentu eleitorál sira, disponivél iha portugés no tetun.

Iha mós rekomendasaun daruak, simu reforma legál, inklui introdusaun husi regulamentu sira, ho antesedénsia natoon husi siklu eleitorál hodi bele fó tempu ba parte interesada sira hodi komprende no prepara ba regra foun sira.

Nune’e mós Konsulta baibain Komisaun Nasionál ba Eleisaun sira (CNE) ho maneira sistemátiku bainhira prepara enkuadruamentu regulamentár eleitorál, no hametin supervizaun kona-ba kampaña nia finansiamentu, ne’ebé fó ba CNE kompeténsia klaru ida iha área ne’e no halo kapasitasaun husi órgaun ne’e hodi assume knaar afirmativu no proativu.

Ba rekomendasaun ikus mak halo revizaun kona-ba regra finansiamentu kampaña no relatóriu kontas sira-nia rekizitu hodi hametin igualdade, transparénsia no responsabilidade iha prosesu eleitorál.

Misaun Observasaun Eleitorál Uniaun Europeia nian ba Timor-Leste 2022 hamutuk ho Delegasaun Uniaun Europeia iha Timor-Leste nia kolaborasaun iha loron kinta (14/07) sei organiza  meza redonda ida kona-ba implementasaun rekomendasaun sira-nia futuru hamutuk ho prinsipál interveniente sira husi prosesu eleitorál. (*)