Ministru Transporte no Komunikasaun (MTK), José Agustinho da Silva informa, Ró Berlin-Ramelau rute Dili-Oekussi ba mai, ne'ebé horiseik segunda (30/05), hahú hikas operasaun, hafoin para kuaze fulan-ida tanba kondisaun pesa balun at.
“Tripulante timoroan sira ne’ebé durante ne’e lori ró ne’e, agora hetan apoia mós husi espesialista membru F-FDTL husi komponente Navál na’in-2, ne'ebé mak ajuda ita-nia tripolante sira hala'o operasionalizasaun ba ró durante movimentu iha tasi laran”, dehan Ministru Jose Agustinho, iha Palásiu Governu, tersa (31/05).
Iha R’o nia operasaun bele la’o di’ak nafatin maske iha ona esperiénsia katak ró ne’e hetan asidente ona ho tripulante Timoroan, maibé nafatin fó konfiansa hodi halo jestaun.
“Ne’e situasaun ne’ebé Governu tenke solusiona emediata. Ita-nia situasaun jerál durante ne’e liga ba ró-ahi rua (Berlin-Ramelau no Berlin Nakroma), tau ba kestaun tripulante, tanba ita-nia sasán, maibé ema estranjeiru mak opera. Situasaun ne’e mak durante eziste maibé halo akizisaun ró-ahi foun iha kedas planu oinsá aselera prosesu”, hatete nia.
Ba Timoroan sira ne’ebé durante ne’e hasai estudu iha área ne’e, oportunidade oferese ba sira hodi jere rasik ró-ahi ne’e maibé durante ne’e hasoru difikuldade, ne’ebé situasaun reál akontese katak ró-ahi ne’e soke ahu-ruin sira, entaun buka solusaun tanba ró ne’e hasai kustu boot.
Nune'e iha futuru presiza fasilita formasaun ba joven sira hodi hasa’e abilidade, kapasidade tékniku hodi prodús tripulante ne’ebé profissionál hodi jere Timor nia ró rasik la ho apoiu hosi nasaun seluk. (*)