Tempotimor (Dili) - Relasiona ho situsaun ne'ebé la'o daudaun iha rai laran, Xefe Estadu Maiór F-FDTL, Majór Jenerál Lere Anan Timur, husu ba povu tomak atu tuur hakmatek hodi halo ida-idak nia atividade.
Tempotimor (Dili) - Partidu CNRT Husu atu entidade hotu tuur hamutuk buka solusaun ba impase polítika ho laran no fuan moos.
Partidu Consello Nacional Reconstrução Timor-Leste (CNRT) hafoin remata entrega surat husi Prezidente CNRT, Kay Rala Xanana Gusmao ba Prezidente Repúblika, Francisco Guterres Lú Olo, apela atu partidu polítiku no entidade sira hotu ne'ebé halo diálogu atu ko'alia ho onestu no domin hodi hetan solusaun di'ak.
"Hotu-hotu tenke mai ho vontade moos tebetebes atu mai buka solusaun, ho domin no dame," dehan Sekretáriu Jerál CNRT, Francisco Kalbuadi Lay, iha Palásiu Prezidensiál, Bairru-Pité, Kinta (23/1).
Nia akresenta, CNRT mai ho vontade atu rona hanoin hotu husi Prezidente Repúblika tanba ne'e husu ba povu tomak atu hakmatek.
Hafoin Orsamentu Jerál Estadu (OJE) tinan fiskál 2020 xumba iha Parlamentu Nasionál, Xefe Estadu deklara halo diálogu ho entidade hotu. Nune'e, CNRT maka sai nu'udar partidu polítiku ba dahuluk diálogu ho Prezidente Repúblika. (*)
.