Tempotimor (Dili)-Projetu Konstrusaun estrada diresaun Munisípiu Baukau na Munisípiu Lautein ho distánsia 57,6 kilometru (km) dadaun ne'e atinje ona pursenru ualunulu resinhaat (84%).

Konstrusaun ba projetu ne'e, hahú iha loron 05 fulan-setembru 2017 no tuir lolos remata iha loron 21 fulan-fevereiru 2020, maibé lakonsege tanba situasaun polítika no pandémia Covid-19 ne’ebé atraza prosesu finalizasaun ba projetu refere.

Ministru Obras Públika (MOP), Salvador Eugénio Soares dos Reis Pires, akompaña husi Diretór Jerál Administrasaun no Finansa (DJAF), Januário Patrício Barbosa, no Jestór Unidade Jestaun Manajementu (PMU) estrada, Sidónio Amaral Freitas, iha loron (23/6),  halo inspesaun ba progressu konstrusaun estrada nasionál diresaun husi munisípiu Baukau to’o munisípiu Lautein hodi haree nia progresu.

Maske Governu firme fó apoiu ba projetu konstrusaun estrada ne'e maibé husu ba emprezáriu sira atu garante kualidade infraestrutura oinsá bele fó benefísiu ba komunidade sira ne’ebé asesu.

“Ha’u-nia fatin nakloke no suporta ita-boot sira hodi ko’alia ba issu sira ne’ebé relevante, bazikamente hodi fasilita povu Timor-Leste. Ha’u-nia parte sei halo buat hotu hodi suporta ita-boot sira-nia servisu, no dala ida tan, favór garante kualidade ne’ebé di’ak. Kualidade projetu ne’e mak importante tebes”, dehan Ministru Salvador iha Postu Administrative Laga, munisípiu Baukau, kuarta (23/06).

Durante iha atividade inspesaun, MOP haree direita progresu konstrusaun, rona preblema no preokupasaun ne’ebé kompaña kontratór no konsultór infrenta iha tereñu, inklui haree mós kualidade konstrusaun estrada refere.

Aleinde observa pontu importante sira iha konstrusaun estrada trosu Baukau-Lautein ne’ebé presiza halo realineamentu iha área protezidu sira, ponte ejistente sira, no prosesu indiminizasaun ba komunidade afeitadu sira.

Husu mós kompaña konsultór atu servisu hamutuk, koordena no ko’alia ho komunidade afeitadu sira ba prosesu indiminizasaun, nune’e bele fasilita konstrusaun trosu refere hodi labele atraza prosesu konstrusaun.

Enkuantu orsamentu ne'ebe utiliza ba projetu konstrusaun estrada ne'e mai husi finansiamentu fundu impréstimu husi Banku Dezenvolvimentu Aziátiku (ADB) ho montante US$29,315,346.10.

Empreza ne'ebé hala’o projetu mai husi Internasionál joint venture husi kompaña CBMI Construction CO/LTD no Chonqing Road Engineering Group CO/LTD no hetan superviziona husi kompaña Internasionál Donsung Engineering CO/LTD, iha Joint Venture hamutuk ho Dongil Engineering CO/LTD, asosia hamutuk ho kompaña nasionál Kai Watu Kmanek Consultant Unip.Lda. (*)

Tempotimor (Dili)-Adminitradór Munisípiu Lautein, Domingos Sávio hatete, dadaun ne'e númeru kazu pozitivu Covid-19 iha Lautein hamutuk na’in-13, maibé situasaun kontroladu.

Ho númeru kazu pozitivu ne’ebé iha mak Governu liuhusi konsellu Ministru fó sai serka sanitária ba Munisípiu sia inklui mós Lautein iha loron kinta (29/04) ba loron 14.

Maske nune’e, situasaun iha Munisípiu Lautein ho kazu ne’ebé tama iha kategória esporadiku durante ne’e.

"Situasaun la’o normal, tanba ami ne'e la’ós área afeitadu maske iha ne'e pozitivu sa’e ba 13 pesoál maibé ita kontroladu hela tanba sira ne'ebé mai husi Dili mak lori mai ita tau iha kuarentena sira ne'e mak ita deteta sai pozitivu, ita lahetan sira (covid-19) iha komunidade nia leet”, dehan Domingos ba www.tempotimor.com liuhusi telemóvel, sábadu (01/05).

Antes ne'e, Adminitradór Lautein rasik propoint atu Munisípiu Lautein seidauk nesesita atu aplika Serka Sanitária (SS) maibé governu deside ona.

Maibé, Munisípiu Lautein seidauk hetan ajudu umanitária ruma hanesan hahán no prosesu distribusaun sesta bázika mak semana kotuk hahú implenta hikas tuir protokolu saúde.

Ba prosesu vasina ne'ebé inplementa ba front line iha Munisípiu Lautein rasik remata ona mesmu iha komunidade barak mak hakarak vasina.

"La’o di’ak, so que front line de’it. Iha ne'e ita-nia komunidade mós hakarak vasina maibé tanba ai-moruk (vasina) mak limitadu ne'ebé seidauk vasina komunidade sira”, dehan nia. (*)