“Sim ajuda karidade ne'e la'ós foti iha fatin seluk maibé ida ne'e ami-nia kbi’it rasik e atravesa liuhusi kuarezma ita enfrenta dadauk, tanba tinan rua tuituir malu ita la komemora loron PNTL entaun iha dadauk ne'e ita PNTL ami apoiu, ami tau hamutuk lolo liman ba malu e oinsá mak ita fó mós espasu ba malu e ajuda ita-nia komunidade ne'ebé mak kbi’it la’ek”, dehan Komandante Polísia Nasionál Timor-Leste (PNTL) Munisípiu Lautein, Superintendente Antonio Rei Fernandes, ba jornalista sira iha Edifísiu PNTL Lautein, domingo, (27/03).

Nune'e mós moto Munisípiu Lautein ne'ebé hamutuk atu haforsa Lauteinoan, nune'e PNTL Munisípiu tau ba prátika.

“Ita responde ba moto Lautein ninian katak, hamutuk Lautein forsa, forsa hamutuk Lautein bele, entaun ita tenke ser tau ba prátika ida ne'e mak kbi’it balun ne'ebé mak ami PNTL ida-idak nia bolsu rasik depois mak tau hamutuk depois bele oferese b komunidade kbi’it la’ek sira”, afirma nia.

Família Kbi’it Laek ne'e mak Polísia Komunitáriu identifika mai husi postu aldeia no suku ne'ebé la hanesan iha Munisípiu Lautein ne'e rasik.

Totál benefisiáriu sira ne'ebé mak PNTL Munisípiu Lautein apoiu iha ámbitu Komemorasaun loron PNTL ba dala-22 ne'e hamutuk ema na'in-10. (*)