“Kooperativa ohin ne'e, bolu Kooperativa komérsiu ne'ebé espesífiku ba PNTL Lautein, ho objetivu husi Kooperativa ne'e atubele fó vida ba membru PNTL sira, nune'e evita sira ba deve osan iha kioske sira maibé iha institusaun rasik bele ajuda sira asegura fó finaseiru oinsá atubele sira-nia prosperidade família nian”, dehan Elizário Ferreira hafoin inaugura sede POLKOM, iha Komandu Polísia Nasionál Timor-Leste, Munisípiu Lautein, domingo (27/03).
Kooperativa POLKOM Lautein bele sai referénsia ba munisípiu sira seluk, nune'e membru PNTL labele ba deve osan iha liur osan hodi halo moe instituisaun maibé bainhira ho kooperativa rasik sei la halo moe institusaun rasik.
"Estadu mai reforsa de'it, atu sira iha kbi’it asegura sustentabilidade institusionál, asegura estabilidade finanseira ho estabilidade ekonómiku, atu evita Polísia ema institusaun nian labele ba deve osan iha kios sira”, hatete nia.
Alende Sekretáriu Estadu Kooperativa sei kontinua apoiu hodi haforsa Kooperativa atu promove nafatin, no sai ezemplu ba PNTL Munisípiu sira seluk.
“Ho kooperativa ohin ita inaugura ne’e ha'u sei nafatin, hamri’ik reforsa, Kooperativa ne'e no promove nafatin, hodi nune’e ba Komandu PNTL munisípiu sira seluk ne’ebé seidauk hari’i kooperativa bele tuir Lautein”, dehan nia.
Komandante PNTL Munisípiu Lautein, Superintendente António R. Fernandes hatete, konteudu husi POLKOM ne'e ajuda membu PNTL Lauteein, tanba membu barak mak sempre deve osan.
“Membru barak mak deve ne'e osan iha liur entaun ita hari’i kooperativa ne'e oinsá mak ajuda ami hodi minimiza débitu sira, nune'e ita nafatin lori imajen PNTL ne'e ba oin ho di'ak Kooperativa kréditu ne’e kada membru fulan ida hatama osan ba Kooperativa ne'e $50.00”, subliña nia.
Kooperativa POLKOM rasik hari’i iha tinan 2015, haree liuba kooperativa kréditu union no kooperativa produsaun agrikola maibé tanba de'it parte balu hanesan kondiasaun la favorável ne'e entaun, bainhira iha 2020 mak hamutuk fó hanoin malu normaliza fali.
Ba sede kooperativa POLKOM ne'ebé inaugura ne’e, apoiu ho osan $5.000 husi SEKOOP atu halo kompleta nesesidade ne'ebé mak atu sira presiza, tanba sira rasik iha kapitál hanesan fundadór kooperativa nian. (*)
