Akontesimentu ne’e, iha dalan área suku Bukoli loron 11 fulan-janeiru tinan 2022 (ohin) tuku 03:50 madrugada, hafoin karreta pick-up Cary ho sapa matrikula 38-742 Tls kór metan diresaun Munísipiu Lautein, Postu Administrativu Iliomar atu halo viajen ba Dili mak soke no rezulta ema na'in-10 tama Ospitál Baukau, maibé na'in-ida la konsege sala nia vida hafoin halo tratamentu.
Xefe Kontrolu Kualidade no Komunikasaun Sosiál HoREX, Claudino Ximenes hatete, antes evakua vítima ne'e hamutuk ho nia maluk sira husi fatin asidente tráfiku Bukoli to'o iha HoREX matebian rasik kondisaun todan, tanba hetan kanek iha parte oin laran.
"Ami konsidera baku ba aspal, nia rentos ne’e. Médiku sira hothotu halo esforsu tomak atu salva, maibé labele salva tuku 09:30 iha emerjénsia," dehan Claudino iha sala emerjénsia HoREX Baukau, tersa (11/01).
Asidente ne’e, vitíma feto-ida ho idade 23 (ohin) tuku 10:00 transporta ona ba Ospitál Nasionál Guido Valadares (HNGV) Dili hodi halo tratamentu intensivu tanba fraktura plefik.
Nune'e mós, iha vitíma seluk ho naran Salvador da Silva ho idade 18 hetan traumakapitis, tanba parte oin laran nakles, no médiku sira halo ona karta referénsia atu transporta ba HNGV.
"Tanba, informasaun ne'ebé ami hetan husi pasiénte sira katak soke moru, entaun sira iha karreta kotuk semo sai arbiru de'it," haktuir nia.
Observasaun www.tempotimor.com iha tereñu nota katak, mate-isin Agustino Charles dadaun rai hela iha sala mortuariu HoREX Baukau ne’ebé hetan akompaña husi família no sei lori ba matebian nia hela fatin Iliomar hodi haloot tuir tradisaun. (*)