Komadante Polísia Nasionál Timor-Leste (PNTL) eskuadra Postu Baukau Vila, Marcelino Fraga, informa, akontesementu ne'e (horseik) pur-volta tuku 07:30, iha área Telekom vila nova, suspeitu naran Paulino Ximenes Perreira idade 45 kondisaun moras mental, baku vítima Domingos Ximenes ho idade 63 , to'o grave.
"Iha kazu ida la'os taa, maibé baku, rian ho rian sira na'in-2 mesak iha uma, sira na'in-2 baku malu, ida nia rian kondisaun moras mental ne'e baku ida kondisaun normal ne'e," dehan dehan nia iha kna'ar fatin vila antiga, kinta (02/06).
Hafoin akontese komunidade sira liga ba parte PNTL to'o kedas iha fatin hodi transporta tiha vítima ba Óspital Rejionál Eduardo Ximenes (HoREX-sigla portugés) Baukau halo tratamentu.
"Nia kanek iha parte ulun karuk, ho nia hasan parte karuk tohar, nia liman karuk tohar ho nia tilun parte los mak nakles," nia informa
Enkuantu halo tratamemtu iha HoREX Baukau lakonsege, nune'e loron 02 fulan-juñu (ohin) transposta ona ba Óspital Nasionál Guido Valadares (HNGV-sigla portugés) Dili hodi kontinua halo tratamentu.
"Suspeitu iha hela ne'eba sira (membru PNTL) lori mai iha eskuadra, mais ami latau iha sela, tanba ema ne'e kondisaun saúde la normal, tanba wainhira ita husu ba ko'alia la sambung," nia agresenta
Enkuantu suspeitu ho vítima husi Suku Buibau, Postu Administrativu Baukau Vila, motivu husi akontesementu seidauk relata, tanba sei hein vítima nia kondisaun. (*)
