“Kazu detetatu foun ne’ebé relata iha loron 5 fulan-maiu tinan 2021 hamutuk 133 ne'ebé kompostu husi munisípiu Dili 109, iha munisípiu seluk 24”, dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liuhusi komunikandu imprensa, kuartu (4/5).
Husi totál kazu detetadu foun iha mane 74, feto 59, ho idade tinan 12 na'in-3, idade entre tinan 12-59 na'in-127 (95,4%) no idade 60 na'in-3.
Proporsaun kazu sintomátiku hamutuk 21,8%, sintomátiku durante loron 7 nia laran, aumenta husi mediana 8,8% iha semana 2 liuba, ba mediana 15,1% loron 05 fulan-maiu hatudu tendénsia atu surtu Covid-19 iha Timor-Leste avansa ba modelu ho predominánsia iha kazu sintomátiku.
“Totál kazu konfirmadu kumulativu iha 5 fulan-maiu tinan 2021 (sura husi 21 Marsu 2020) hamutuk na'in- 2786, kazu rekuperadu na'in-34, kazu ativu na'in-1414”, informa Rui.
Durante loron rua nia laran Laboratóriu Nasionál Saúde (LNS) halo 1160 testes PCR iha Dili, ho detalla hanesan vijilánsia sentinela 34, rastreiu ba kontaktu (Contact tracing) 94, rastreiu aleatoriu (Random Screening) 571, viajen sai husi serka sanitária Munisípiu Dili 459, viajen internasionál 2 no Follow up iha kuarentena laiha kazu.
Rezultadu husi testes PCR ne’ebé halo horiseik loron 4 fulan-maiu iha munisípiu sira seluk hamutuk 432, ho detalla hanesan, Baukau 163, Ermera 33, Maliana 24, Maubisse 112, RAEOA 6, Suai 22 no Vikeke 72.
Teste follow up ba sira iha fatin izolamentu 66 (27 negativu ona, 39 sei nafatin pozitivu). (*)