Tempotimor (Dili) –  Atu atua no hapara kazu oho malu entre joven iha kapitál Dili, Ministru Interiór (MI) interino, Filomeno da Paixão de Jesus fó ona ordem eskritu ba Komandante Jerál PNTL, Komisáriu Faustino da Costa, hodi foti medida.

"Ha'u fó ona ordem ba Komandante Jerál PNTL, Komisáriu Faustino da Costa. Imi ( jornalista) ba husu nia, kona-ba servisu operasionál. Ema preokupa ho kapasidade komjer nian. Ita iha fulan tolu para atu haree. Maibé, ha'u fó ona tinan ida para komisáriu asegura. Maibé, tinan ida ona mós mosu nafatin," afirma MI interino ne'e iha Palásiu Governu, Kuarta (20/11/19).

Tuir atuál Ministru Defeza no Seguransa ne'e, kazu kontinua nafatin tanba menus eskala PNTL nian hodi halo servisu.

"Ha'u sente menus eskala karik. Iha Polísia ne'e, ema ida tenke servisu oras ualu. Purtantu, oras ualu ne'e nia kolokadu iha ne'ebé? Se operasionál, bainhira nia hahú iha meia noite, entaun nia tenke hotu iha tuku ualu dader," dehan Filomeno.

Governante ne'e dehan, bainhira eskala seguransa nian iha ona, mak Dili laran PNTL kontrola hotu. Tanba, ema servisu hotu tuir nia regras.

Realidade ne'ebé sei akontese, tuir Filomeno, PNTL labele halo seguransa ba ema ida-idak. “Tanba, seguransa ne'e la'ós iha Polísia nia liman de'it. Maibé, iha mós universidade, eskola sira, inan-aman no aspeitu sira seluk,” nia esplika.

Tempotimor (Dili) – Planu prioridade ne'ebé parte tribunais aprezenta ba Orsamentu Jerál Estadu (OJE) 2020, atu haree kondisoens tribunál. Inklui mós atu harii rezidénsia 13 ba juis sira iha Oe-cuse (2), Suai (6) no Baukau (7).

"Presiza halo konstrusaun rezidénsia ba juis iha munisípiu sira hanesan Baukau, Suai no Oe-cuse. Tanba juis maioria la hela iha ne'ebá. Maibé sira hela iha Dili mak ba hala'o servisu iha ne'ebá. Nune'e, presiza kria rezidénsia di'ak ba sira atu bele hala'o servisu ho diak," esplika Prezidente Tribunál Rekursu, Deolindo do Santos iha Palásiu Governu, Kuarta (02/10/19).

Deolindo subliña, iha Oe-cuse atu halo reabilitasaun ba rezidénsia atuál no atu harii foun tan rezidénsia rua(2), Suai iha ona fatin atu harii rezidénsia minimu neen (6) ba juis sira no iha Baukau atu halo rezidénsia hitu (7). Tanba, daudaun ne'e juis sira kolokadu iha ne'ebá nain hitu.

Deolindo dehan, iha mós planu balun atu harii tan tribunál iha Dili, Suai no Baukau. "Tanba ita haree tribunál sira uluk ne'e la sufisiente," nia dehan.

"Iha planu prioridade hirak ne'e, mak ha'u mai ko'alia ho Primeiru Ministru. Nune'e  hetan kedas rezultadu pozitivu husi Primeru Ministru Taur Matan Ruak," tenik Deolindo.

Tempotimor (Díli) – Ministra Solidariedade Sosiál no Inkluzaun (MSSI), Armanda Berta deklara katak Orsamentu Jerál Estadu (OJE) tinan 2020 ne'ebé Governu aloka ba MSSI ho montante milioens US$ 56, seidauk sufisiente. Nune'e, MSSI iha planu sei husu aumenta tan.

"Sim. Orsamentu Jerál Estadu (OJE) ne'ebé MSSI hetan mak milioens US$ 56. Ne'ebé, ba oin ita sei elabora hela no orsamentu nia totál ne'e ministériu sei adianta tan, para bele aumenta tan uitoan hodi haree mós ba nesesidade seluk ne'ebé mak iha," tenik MSSI, Armanda Berta iha salaun MSSI, Kinta (05/09/19).

Tuir MSSI, orsamentu ne'ebé MSSI iha sei preve liu iha área defisiensia, umanitariu, inklui pilar tolu ne'ebé MSSI iha, no mós ba programa prioridade ualu ne'ebé mak ministériu  elabora tiha ona.

Tempotimor (Dili) – Bankada PLP lamenta ho polítika ONG Plan Internasionál (PI) ne'ebé prepara joven feto sira, atu hola parte iha orgaun estadu nian iha oras balun nia laran.

"PLAN Internasionál prepara ona la'ós model hanesan ne'e. Viola regras hotu, buka saida iha ne'e? Plan Internasionál ne'e organizasaun ida, Parlamentu Nasionál iha juventude, Juventude Parlamentar. Agora, ita ema mai ida-idak, ita mai halo orgaun ida ne'e, parte ida ita dignifika estadu, maibé parte ida ladi'ak, nu'udar estadu direitu demokrátiku," dehan Deputadu PLP, Francisco Vasconcelhos iha plenária bainhira Mália da Costa hola pozisaun nu'udar deputada PD, durante oras ida nia laran, Segunda (14/10/19).

Deputadu ne'e la konkorda ho átu ne'ebé mak Plan Internasionál halo. "Ha'u la konkorda ho átu ne'e. Ita labele buka popularidade, depois ita viola regras hotu, ita nia preparasaun ba ita nia joven sira la'ós ho maneira sira hanesan ne'e,” deputadu hatete.

Iha fatin hanesan, deputada Josefa Soares katak hakarak atu dignifika estadu tenke iha regras.

"Ita hakarak atu dignifika estadu ne'e la'ós ho maneira sira hanesan ne'e. Hakarak halo tratamentu bainhira ema, sim señor, Parlamentu Nasionál bele konsede fatin seluk, para sai hanesan treinamentu. Maibé, la'ós iha plenária soberanu ida ne'e. Se ita hakarak dignifika estadu ne'e tenke tuir regras. La'ós ONG ida mai fali iha ne'e no hakat liu fali. Ida ne'e labele," hatete Josefa.

Hatan ba kestaun ne'e Prezidente Parlamentu Nasional (PPN) Arão Noé de Jesus da Costa Amaral katak, asaun ne'e soe ona ba lidera bankada, maibé Laiha pronunsia ruma kona-ba prezensa alin Mália.

"Iha dia 11 Outubru, loron mundiál labarik feto sira. Tanba ne'e, asaun ne'e hahú kedas iha semana kotuk, PR nia halo, PM mós halo, inklui membru Governu balun halo ona.  Tanba ne'e, ohin molok alin ne'e tama mai, ha'u soe ona ba lideres bankada sira. Maibé, laiha pronunsia entaun ita fó alin ne'e mai hola pozisaun hanesan Prezidente Bankada (PD)," dehan PPN Arão.

Tempotimor (Dili) – Oitavu Governu konstituisional ne'ebé lidera husi Primeiru Ministru (PM) Taur Matan Ruak, prevé Orsamentu Jerál Estadu (OJE) tinan fiskal 2020 nian, hamutuk millaun $56 ba Ministériu Solidariedade Sosiál no Inkluzaun (MSSI).

"Orsamentu Jerál Estadu (OJE) 2020 ne'e hamutuk millaun $56, ne'ebé nafatin ba kategória haat mak hanesan saláriu i vensimentu millaun $1.7, bens i servisu milliaun $6.2, transferénsia públika mak boot iha milliaun $50 no tau uitoan iha kapitál menór," dehan Vise Ministra MSSI, Signi Chandrawati Verdial iha Parlamentu Nasionál (PN), bainhira hala'o audiénsia ho Komisaun C no F iha PN, Kuarta (06/11/19).

Tuir Signi, MSSI tau osan uitoan ba Kapitál Menór para hodi hola fali transporte ba servisu nian, bainhira aat ona.

"Tau uitoan ba Kapitál Menór para karik karreta funeráriu aat ona, motor ladi'ak entaun ita iha planu tinan oin hola karreta kuaze 60 ba servisu na'in sira iha munísipiu, komputador sira liu tinan sanulu, balun aat ona, inklui meza no kedeira," dehan Signi.

Nia afirma, iha tinan 2018 tau duni osan millaun $40. Maibé hola tiha kareta ba Komisária Direitu Labarik, entaun tinan 2020 nian sa'e uitoan.

Nia komenta, tinan 2020 MSSI iha programa boot balun ne'ebé iha ona. “Programa prioridade ida mak ita nia Institutu Seguransa Sosiál ne'ebé di'ak ba ita hotu. Ita hakarak asegura sustentabilidade, inklui ita hakarak promove inkluzaun sosiál, liuliu grupu feto ne'ebé mak vulneravel sira, bele hola parte iha dezenvolvimentu," dehan Signi.

Tempotimor (Dili) – Koordenadora grupu to'os na'in Haburas Moris (KHM) Rince Nipu, husu ba Governu atu hadi'a sistema pagamentu ba to'os na'in sira. Saláriu ne'ebé simu tarde, hamosu konfuzaun iha familia laran. Inklui grupu.

"Bainhira pagamentu tarde, mosu violénsia iha to'os na'in sira nia familia no sira nia grupu. Tanba, sira simu osan tarde, iha sira nia grupu hirus malu. Sira duun malu no lori malu ba Governu. Gasta ona tempu tan atu hetan de'it pagamentu ne'e," dehan Rince Nipu iha salaun João Paulo II Comoro, Sesta (22/11/19).

Nia dehan, tan pagamentu tarde, to'os na'in lakon sira-nia konfiansa ba Governu. Tanba Governu la haree ba nesesidade to'os na'in sira nian.

"Lia fuan lakon konfiansa mosu, tanba pagamentu tarde. Tanba to'os na'in bainhira halo to'os no koleita presiza osan. Bainhira sira halo to'os ne'e, selu ema hodi halo to'os. Maibé, bainhira koleita hotu ona, sira simu osan tarde. Ida ne'e mak halo sira lakon fiar no triste," Rince tenik.

Alende ne'e, turi Rince problema seluk ne'ebé sira hasoru mak menus transporte.

"Bainhira produtu sira ne'ebé ami prodús ne'e koleita ona, ami labele lori to'o iha merkadu nasionál, tanba transporte laiha. Tanba, husi Maliana mai Dili, ret ida pelumenus $250 to'o $300 kada kareta," dehan Rince.

Tempotimor (Dili) – Selebrasaun 12 de Novembro ba tinan 2019 Comite 12 Novembro entrega direita ba Governu hodi jere aktividades hotu-hotu.

Iha tinan ida ne'e, Governu mak sai hanesan uma na'in no sai mós komisaun ba selebrasaun loron espesiál 12 de Novembru.

"Comite 12 de Novembro sei apoiu hanoin no planu programa ruma.Tanba ne'e, aktividade ka programa entrega ba Governu liuhosi Sekretáriu Estadu Juventude Desportu (SEJD) mak sei jere. comite hanesan tau matan de'it," dehan Xefe Administrasaun Comite 12 Novembro, Rogeiro Castro da Cruz iha Sede Comite 12 Novembro, Balide, Tersa (24/09/19).

Nia hatutan, komite 12 Novembro nu'udar autór ba komemorasaun ne'e. Tanba ne'e mak komite konvida parte seluk atu jere.

"Tamba Comite 12 Novembro hanesan autór depois kada tinan husi komite mak konvida fali ema no jere fali atividades ne'e ladún di'ak. Nune'e, tinan ida agora entrega ba Governu no jerasaun foun sira mak jere," Rogeiro relata.

Relasiona ho komemorasaun loron nasionál juventude ne'e, tuir Rogerio, Governu mak hatene. Nia dehan, orsamento ba atividade ne'e bele $ 80.000 no bele mós to'o $ 100.000).

Tempotimor (Dili) – Deputadu Antonio Verdial, lansa kritika ba atividade balun husi governu, ne'ebé nia dehan hanesan ‘asal-asal’ de'it. Kestaun ne'e, tuir Verdial, bele nota husi livru OJE 2020 ne'ebé la deskreve konkreta.

"Ha'u nia diskrisaun haree atividade balu hatuur ‘asal-asal’ ou naran dei't. Tanba, iha livru OJE 2020 la haklaken ka la deskreve konkreta katak, osan hira mak aloka ba kada departamentu no ba atividade saida nian," dehan Antonio Verdial nia intervensaun iha Parlamentu Nasionál, Tersa (03/12/19).

Verdial afirma, bainhira deskreve la konkreta ne'e, susar atu identifika frakeza iha liña ministeriál ida-idak no difisil ba ministériu ida, atu hatene iha departamentu ne'ebé mak iha frakeza.

Nia dehan, ho alokasaun OJE 2020 hanesan ne'e, la iha departamentu ida atu hatene, osan fiskál  tinan 2020 nian hira mak aloka, ba atividade saida?

Verdial akresenta, Buat hirak ne'e, fó dalan ba manipulasaun orsamentu husi pesoál. Ne'e, bolu la responsablidade atu trata asuntu finansas. Tanba, akontese ne'e dala barak ona.

"Hau brani ko'alia, tanba ha'u la'ós polítika murni. Maibé, mai husi téknika superiór ne'ebé hala'o knaar iha funsaun públiku," nia tenik.

Deputadu KHUNTO ne'e afirma, kuandu husi departamentu hato'o pedidu ba finansas atu halo atividade, dehan osan halo hotu ona, a final atividade balun seidauk halo.

Verdial esplika, alokasaun orsamentu ne'ebé laiha indikasaun klaru, kona-ba departamentu responsabiliza nia ezekusaun, sei mosu manipulasaun ba atividade urjente sira ne'ebé la tama iha planu.

Tempotimor (Dili) – Ministru Saúde (MS) interino, Bonifacio Maucoli Dos Reis dehan, nia parte seidauk hatene kona-ba ema deskoñesidu lori sai sasán médiku husi Hospitál Nasionál Guido Valadares (HNGV), iha dia 08 Novembru maizumenus tuku 09.14 kalan.

“Ha'u seidauk hetan informasaun. Depois ha'u hetan ha'u sei verifika. Depois mak ha'u fó fila informasaun,” dehan MS interinu ne'e iha Palásiu Governu hafoin remata reuniaun Konsellu Ministru, Kuarta (20/11/19).

Iha fatin hanesan, Vise Ministra Saúde, Elia dos Reis Amarál hatete, sei mosu duni iregularidade, nia parte sei lori ba dalan legál.

"Ne'e informasaun. Seidauk hatene loos duni ka lae. Sei karik loos sei submete ba parte legal. Sei laloos signifika informasaun de'it," dehan vise MS ne'e.

Nia dehan, bainhira informasaun ne'e loos duni, sei entrega ba diretór HNGV hodi bele haree saida  mak nia bele halo.

"Durante ne'e, regras iha hela. Mas kariik ida ne'e mak akontese duni, sei submete ba iha diretór. tanba diretór mak iha responsabilidade aas, hodi responsavél ba iha iregularidade ne'ebé mak iha parte HNGV nian," dehan Elia.

Hanesan média ne'e públika ona, iha 08 de Novembru 2019, maizumenus tuku 09.14 kalan, autoridade seguransa iha Hospitál Nasionál Guido Valadares (HNGV) konsege deteta feto na'in rua, hit sasán balun (dos rua), sai husi odamatan HNGV hodi tula sasán hirak ne'e, iha karreta Jeep koor mean.

“Ami investiga hela lala'ok hirak ne'e, tanba mosu deskonfia katak sasán balun iha HNGV ema tula sai,” hatete fontes ne'ebé lakohi temi nia identidade ba tempotimor.com, Tersa (19/11/19).

Fontes ne'e informa, lala'ok ne'e mós akontese tan iha loron Tersa (12/11/19). Ho karreta tipu no koor hanesan, feto na'in rua tula tan sasán balun ne'ebé deskonfia sasán médiku, sai husi resintu HNGV no tula sasán hirak ne'e iha karreta, ne'ebé para hela iha karreta para fatin, besik HNGV.

Fontes ne'e katak, parte seguransa halo ona investigasaun ba karreta na'in. Informasaun preliminaria hatudu mosu indikasaun forte katak, iha aktu ne'ebé lori sai ekipamentus médiku husi HNGV ba liur.

“Sim. Investigasaun se la'o hela. Deskonfia iha ema laran mak envolve,” fontes ne'e hatete tan.

Ba média ida ne'e, fontes ne'e hato'o ninia laran triste. Nia dehan, bainhira HNGV menus aimoruk públiku no Parlamentu sempre hakilar kestiona, hodi fó todan ba manajementu HNGV.

“Maibé, dala balu mosu mós hahalok balun hodi fó prejuizu,” nia hateten.

Tempotimor (Dili) – Nu'udar setór importante ida, Parlamentu Nasionál (PN) husu ba Governu atu hadi'a infraestrutura edukasaun iha rai laran, ne'ebé durante ne'e mukit ho kualidade hakdasak. Ho nune'e, bele garante kualidade estudante nian.

"Prosesu aprendizajen la'o di'ak. Maibé, kona-ba kondisaun eskola nian jeralmente iha territóriu   Timor laran tomak, barak mak ladi'ak. Tanba, eskola barak mak tuan ona. Balun ho kondisaun mobiliáriu laiha, to'o estudante husi ensinu sekundáriu no ensinu tékniku vokasionál tuur de'it iha semente," dehan deputadu José  Pacheco iha PN,  Sesta (04/10/19).

Nia dehan, bainhira kondisaun eskola ladi'ak oinsá estudante sira bele aprende ho di'ak. Tanba ne'e, Pacheco husu ba Governu presiza tau atensaun maka'as.

"Bainhira kondisoens ne'e ladi'ak, oinsá estudante sira bele estuda ho di'ak. Tenke kria kondisaun di'ak, para estudante sira bele aprende. Aat liután mak uma mak ladi'ak. Inklui eskola balun iha munisípiu, komunidade sira mak apoiu hodi hadi'a eskola," dehan deputadu husi Bankada FRETILIN ne'e.

Nia sujere, se hakarak edukasaun atu kualidade, importante liu mak kondisaun depois mak prosesu aprendizajen. Tanba, tuir Pacheco, bainhira kondisaun di'ak estudante sira mak aproveita hanesan biblioteka, sanitasaun báziku,  komputadór ba ensinu tékniku sira inklui merenda eskolar ne'ebé di'ak ba ensinu báziku sira.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com