Tempotimor (Dili)-Parlamentu Nasionál (PN) deside fó autorizasaun ba deputadu sira bankada CNRT, Adérito Hugo da Costa, atubele ba presta deklarasaun iha Tribunál Distritál Dili (TDD), tanba deskonfia liga ahi eletrisidade ilegál.

Votu autorizasun ne'e, Parlamentu Nasionál aprova liuhusi eleisaun eskrutíniu sekretu ne’ebé mak hala'o iha plenária loron segunda (03/05) ho votu afavór 49, kontra 0 no abstensaun 3, nune'e fó posibilidade ba Deputadu Adérito Hugo da Costa atu ba hatan iha Tribunal iha loron 10 fulan-maiu tinan 2021.

“Rezolusaun suspensaun mandatu ba señor Deputadu Adérito Hugo da Costa ba efeitu prosegimentu prosesu judisiál konfirmadu”, informa Prezidente Parlamentu Nasionál, Aniceto Longuinhos Guterres Lopes, iha plenária, segunda (03/05).

Pozisaun PN deside halo supensaun ba funsaun mandatu deputadu Aderito tanba hakarak koopera ho justisa, nune’e prosesu bele la’o ho lalais depende ba tribunál.

“Ohin, ita aprova votu konfirmasaun maibé iha loron 10 fulan-maiu julgamentu la’o ka lae, se la konsege julgamentu, ne’e problema tribunál nian”, hatete nia.

Iha fatin hanesan Deputadu Adérito Hugo da Costa, haktuir ajenda ne’e kleur ona no desizaun parlamentu nian halo tiha ona, maibé agora nia prontu koopera ho tribunál nune’e prosesu ne’e avansa bá oin.

“Ha’u husu atu autoriza hodi aselera prosesu ne’e, tanba ha’u mós lakohi atu prosesu ne’e pendente ho situasaun ida hanesan ne’e. Ha’u ejize atu prosesu ne’e la’o lalais. Ba ha’u iha loron 10 fulan-maiu ne’e bele realiza ona julgamentu, lalais liu di’ak liu”, afirma nia. (*)