Print this page

CNRT Konsidera EE 'Salva' Alkatiri Husi Kazu ConocoPhillips

By October 26, 2021 3260
Deputadu Bankada CNRT, Gabriel Soares. Deputadu Bankada CNRT, Gabriel Soares. Foto Suplay

Tempotimor (Dili)-Bankada Congresso Nacional de Reconstrução de Timor (CNRT) konsidera deklarasaun Estadu Emerjénsia (EE) salva Sekretáriu Jerál Partidu Fretilin, Mari Alaktiri husi prosesu investigasaun kazu simu subornu husi ConocoPhillips.

"Bankada CNRT hare’e katak, Estadu Emerjénsia hanesan oportunidade ba autór justisa nian atu halo pendente prosesu investigasaun ba kazu Subornu ConocoPhilips nian ba Dr. Mari Alkatiri”, dehan Reprezentante Bankada CNRT, Gabriel Soares, liuhusi deklarasaun polítika iha plenária PN, tersa (26/10).

Tanba, keixa ne'ebé Mari aprezenta ba Prokuradoria Jerál Repúblika hodi kontra bankada CNRT no Komisaun Polítika Nasionál CNRT nian, inklui Prezidente partidu CNRT, Kay Rala Xanana Gusmão ne’ebé submete ona ba investigasaun husi Ministériu Públiku, maibé kazu ne’e pendente hela tanba razaun Estadu Emerjénsia. 

Maibé CNRT nota, setór justisa sira mak lori razaun  Estadu Emerjénsia ne'ebé dadauk Timor-Leste aplika, hodi sai hanesan oportunidade atu pendente porsesu investigasaun ba kazu subornu ConocoPhilips ba Mari Alkatiri.

Mesmu nune'e, CNRT kontinua husu autór judisiáriu sira atu aselera prosesu ida-ne’e tanba Povu Timor-Leste kuriozu ka “penasaran” atu hatene lalais lia los husi keixa ne’ebé Sekretáriu Jerál Partidu FRETILIN, Mari Alkatiri hato’o ba Ministériu Públiku hasoru Bankada CNRT no CPN-CNRT.

"Autór judisiáriu nian labele uza fali Estadu Emerjénsia hanesan razaun atu pendente halo kazu ida-ne’e”, dehan nia.

Aleinde ne'e, problema seluk mak kazu skylight, Bankada CNRT haree katak ho Estadu Emerjénsia ida ne’e hanesan meiu ida atu adia prosesu kona-ba kazu Sky Light ne’ebé envolve Mari Alkatiri iha operasaun ne’ebé hamate Prezidente Nicolao dos Reis Lobato. 

Maske, dadauk ne'e Mari Alkatiri halo ona keixa hasoru autór sira ne’ebé denunsia Mari Alkatiri nia envolvimentu iha operasaun Sky Light, maibé to’o ohin loron prosesu ida ne’e pendente no seidauk bele realiza. (*)

 

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items