Tuir observasaun www.tempotimor.com durante prosesu julgamentu, Arguidu JOF ne'ebé akompanã husi advogadu privadu Manuel Tilman tama ba fatin julgamentu 12:19 otl no liu minutu 2 deit hakat sai fali hafoin Tribunál deside TIR ba Arguidu.

Nune'e JOF ne'ebé akompanã mós husi SIK no advogadu privadu Manuel Tilman direitamente prienxe admistrasaun balun husi Tribunál nian antes husik hela TDD.

"Termus Indentidade Rezidénsia, antes ida ne'e ha’u mós tauk hela ba tiha kadeia ne'e mak ha’u husu TIR domisiliáriu. TIR ida mak domisiliáriu, mais la’e, ida ne'e TIR jerál, nia atu sai husi Dili ka ba fatin ida tenki aviza ba Polisia," dehan Tilman iha TDD, Segunda (30/11).

Tilman rasik senti desizaun TIR husi Tribunal ne'e todan maibé favorese, Tilman konsedera JOF hanesan joven ne'ebé mak iha prestasaun no kualifikadu espesifiku iha área ITC mak foin sai nu'udar Prezidenti ANC.

"Desizaun ida ne'e todan no kle’an mais favorese," Tilman dehan.
Antes ne'e, Polisia Nasional Timor Leste liuhusi SIK halo buska ba edifisiu ANC no uma privadu hodi detein Prezidenti JOF inklui rekolla informasaun, dadus seluk no prende karreta marka terios ida tanba deskonfia involve iha kazu internet ilegál, Kinta (26/11).

Ministériu Públiku (MP) akuza arguidu JOF ho krimi Hat (4) hanesan Admistrasaun krime danosa artigu 274, burla imformátika ne’ebé previstu no punidu iha artigu 268, Korrupsaun pasiva artigu 292, no krimi fraude fiskál ne'ebé previstu iha artigu 314 ne'ebé husi krime lima refere hotuhotu previstu iha kódigu penal Timor-Leste.

Entertantu, prosesu julgamentu prezide hosi juiza, Ercila de Jesus, Ministéiru Públiku reprezenta hosi prokuradór Ambrosio Rangel no Lidia Soares no arguidu sira hetan asisténsia legál hosi advogadu privadu Manuel Tilman. (*)

PUBLISIDADE