Tempotimor (Dili) – Ministru Koordenadór Asuntus Ekonómiku (MKAE) interino, Fidelis Manuel Leite Magalhães kompromete sei hadi'a kondisoes Servisu de Registu i Emprezariál (SERVE), iha tempu badak nia laran.

"Servisu de Registu i Verifikasaun Emprezariál (SERVE) tutela iha Ministru Koordenadór Asuntus Ekonómiku (MKAE) nian. Tanba ne'e, presiza hadi'a kondisoes atu bele asegura ba sira nia prestasaun servisu," dehan MKAE interino ne'e iha edifisiu SERVE, Kaikoli, Dili (11/10/19).

Ministru koordenadór ne'e subliña, iha VIII Governu Konstitusionál tau prioridade ba setór   ekonomia no instituisaun públiku. Tanba ne'e, inklui mós SERVE hanesan instituisaun públiku i agensia Governu nian.

"Governu mós reflete tiha ona orsamentu ba tinan oin atu hadi'a nesesidade saida mak SERVE infrenta, i mós Governu kompremitidu sei hadi'a kondisoes báziku ne'ebé ate agora SERVE iha," dehan Fidelis.

Ministru ne'e afirma, Governu iha ona planu liuliu iha diskusaun ba orsamentu tinan oin, no iha ona ideia ko'alia ho diretór ezekutivu SERVE nian, para oinsá bele hadi'a ona kondisaun sira iha tempu badak nia laran, hodi bele iha espasu ne'ebé dignu, atu nune'e bele fó atendementu di'ak liután ba sidadaun sira.

"Ita mós haree mekanismu atu rai dokumentus sira. Tanba, ida ne'e importante tebes. Nune'e Governu mós iha ona dalan atu koalia ho parseiru dezenvolvimentu sira, atu haree oinsá  dizitalizasaun meloramentu sistema informatika sira, para bele salva dokumentus sira ho di'ak  bainhira hetan risku ruma," Fidelis tenik.

Tempotimor (Dili) – Diretór Jerál Turizmu, José Quintas hatete Ministériu Turizmu (MT) preve orsamentu hamutuk millaun $1.2, iha tinan 2020 hodi dezenvolve fatin turistiku iha rai laran.

Orsamentu hirak ne'e, sei foka ba iha situ sira hotu-hotu hanesan dezenvolvimentu rekursu umanu, promosaun, turizmu báziku komunitaria no meloramentu ba servisu.

"Tuir planu estratéjiku 2011-2030, ita atu halo dezenvolvimentu ba fatin turistiku iha zona tolu. Tanba ne'e, mak iha tinan 2020 mak sei halo master plan ba zona tolu ne'ebé hanesan parte Leste, Oeste no Sentral," Jose Quintas esplika iha Otél Novu Turizmu, Sesta (11/10/19).

Diretór ne'e afirma, loloos orsamentu husi MT preve millaun $1.5. Maibé, Komite Revizaun Orsamentu hamenus ba 50 %. Maski nune'e, José dehan, orsamentu ne'ebe iha MT komesa haree ona ba master plan iha tinan 2020 nian, para oinsá atu dezenvolve setór Turizmu no haree ona ba longu prazu.

"Halo dezenvolvimentu, presiza mós planu ida ne'ebé di'ak atu konsidera mós ambiente no impaktu  sosiál. Labele hakfodak mai dezenu BOQ ba hala'o kedas. Ne'e ladún di'ak. Presiza ho pasensia para bele garante ba kualidade dezenvolvimentu," Quintas esplika.

Tempotimor (Dili) – Estudante hamutuk 53.101 husi Ensinu Báziku (EB), Ensinu Sekundáriu (ES) Jerál no Tékniku Vokasionál husi munisípiu 13, sei partisipa iha Ezame Nasionál (EN), ne'ebé sei realiza iha Segunda (14/10/19).

"53.101 estudante ne'ebé kompostu husi Ensinu Baziku ho Ensinu Sekundariu Jerál no Tékniku Vokasionál mak sei tuir Ezame Nasionál iha tinan ida ne'e," informa Ministra Edukasaun, Juventude no Desportu (MEJD), Dulce de Jesus Soares iha seremonia distribui matéria pontus Ezame Nasionál ba 13 munisípiu, iha edifísiu Imprensa Nasionál Timor-Leste (INTL), Kolmera, Sesta (11/10/19).

"INTL entrega ofisiálmente matéria pontus Ezame Nasionál mai Ministériu Edukasaun hodi bele halo distribuisaun ba munisípiu hotu, nune'e bele desloka fali ba Postu Administrativu hodi prepara ba Ezame Nasionál, ne'ebé komesa iha loron Segunda feira oin mai," nia esplika.

MEJD hato'o lia menon ba inan-aman, profesores no komunidade sira hotu, hodi bele fó apoiu espasu no hakmatek ho nune'e estudante sira bele halo preparasaun di'ak liután ba Ezame Nasional tinan ida ne'e.

Tempotimor (Dili) – Prezidente Komisaun E Parlamentu Nasionál (PN), Deputadu Abel Pires konsidera, liña eletrisidade iha área rurál kuaze di'ak ona. Maibé, bee moos sei sai preokupasaun.  

"Iha bee moos nian mak sei preokupa tebes. Iha kapitál Dili de'it sei falta bee moos. Tan ne'e presiza halo eskala seriu liu iha parte bee moos nian, depois mak ba estrada no liña eletrisidade," informa Abel iha Parlamentu Nasionál, Kinta (10/10/19).

Nia rekoñese, infraestrutura báziku kada tinan preokupa hela dei't atu hadi'a. Tantu iha munisípiu no suku balun ne'ebé seidauk di'ak. Maibé, espera ba tan tinan ida rua, garante ona sei asesu hotu," nia promote.

Tuir Abel, durante ne'e, Austrália mós fó sira-nia suporta boot ba infraestrutura estrada rurál, liuhosi programa estrada ba dezenvolvimentu. Tan ne'e, nia dehan, sei garante la'o neineik sei di'ak hotu.

Tempotimor (Dili) – Diretór Nasionál Jestaun no Administrasaun Muzeum Rezisténsia Timorense (DNJA-MRT), Abrão Marino dos Santos katak, husi fulan Jullu to'o Setembru 2019, MRT konsege rekolla taxa hamutuk $1.150 dolares Amérika.

"Fulan tolu nia laran ne'e, ami rekolla de'it $1.150. Osan hira ne'e, ami rekolla husi billete entrada husi estudante Timoroan no vizitante estranjéiru. Kada estudante selu $0.25, vizitante estranjéiru kada ema ida $1.00, ba ferik no katuas sira $0.50 no ba labarik gratuita," tenik Abrão iha nia Knaar fatin, Kinta (10/10/19).

Diretór ne'e afirma, vizitantes ne'ebé hala'o vizita ba Muzeum Rezisténsia Timorense barak liu mak husi estranjéiru.

"Iha tinan 2019, Muzeum Rezisténsia Timorense resista vizitante durante tinan ida ne'e barak liu mak husi estranjéiru, ema hamutuk 1.136 no Timoroan hamutuk 822. Nune'e, vizitante tuir jéneru,  feto mak barak liu kompara mane. Tanba, vizitante feto hamutuk 2.552 no vizitante mane hamutuk 102," dehan diretór ne'e.

Entretantu, sasán sira ne'ebé mak rai iha MRT mak sasán sira ne'ebé uluk eroi sira utiliza hodi defende Timor-Leste. Inklui livru hira ne'ebé mak ko'alia kona-ba istória nasaun Timor-Leste nian.

Tempotimor (Dili) – Deputadu Partidu Libertasaun Populár (PLP), Cornelio Gamma (L-7) husu ba joven Timoroan atu aprende no domina lingua barak.

Tanba, tuir L-7 bainhira Timor-Leste ofisiálmente tama ASEAN, joventude Timoroan bele kompete ho joventude husi nasaun ASEAN seluk. “Joventude sira mak futuru nasaun nian. Tanba ne'e, presiza estuda maka'as no aprende lingua barak, atu bele koloka no kompete iha ASEAN,” hatete membru Komisaun B, Parlamentu Nasionál (PN) ne'e, Kinta (10/10/19).

Relasiona ho setór seguransa rai laran, bainhira TL tama ASEAN, tui eis komandante gerrilleiru FALINTIL ne'e afirma, parte seguransa asegura tebes. Tanba, tuir L-7, ohin loron laiha ona inimigu entre nasaun ba nasaun seluk. Inklui mós iha nasaun ASEAN.

Tempotimor (Dili) – Sekretáriu Estadu Formasaun Profisionál Emprego (SEFOPE), Julião da Silva promote sei hadi'a SEFOPE husi akuzasaun hirak ne'ebé públiku akuza. SEFOPE dehan, ida ne'e atu hadi'a servisu Governu.

Nia dehan, akuzasaun hirak ne'ebé sosiedade kestiona nia parte entrega ona ba KAK, Funsaun Públiku no PDHJ hodi hetan rekomendasaun. “Espera, iha semana ida nia laran hetan ona relatoriu ka rekomendasaun balu husi ekipa independensia hirak ne'e, para bele hadi'a ou mellora servisu di'ak  liután,” Julião hatete.

SEFOPE rekoñese, iha tendensia lubuk ida ne'ebé sosiedade sira kestiona. Nia fó ezemplu hanesan lia fuan nepotismu no servisu laloos.

“Hanoin hirak ne'e, normál. Tanba, sosiedade hotu-hotu iha direitu no papél ida para halo krítiku ba servisu Governu nian, hodi nune'e bele hadi'a," Julião esplika ba jornalista iha Palásiu Governu, Kinta (10/10/19).

Kona-ba rekrutamentu ba traballadór sira ne'ebé atu ba Austrália, Julião dehan iha ona perfil ne'ebé haruka ona ba ajénsia ou kompañia sira, depois agora hein rezultadu manda fila mai. Kandidatu sira mós sei tuir tan teste ba dala ikus nian, para balun ne'ebé prenxe ona rekezitus, bele aranka ba ona," tenik Julião.

Tempotimor (Dili) – Ministru Negósiu Estranjéiru no Kooperasaun (MNEK), Deonísio Babo Soares hatete, iha tempu besik Prezidente Repúblika (PR) sei simu tan lista naran embaxaidór/a sira ne'ebé durante ne'e seidauk simu pose.

"Lista embaixadór/a sira nian iha tempu besik. Semana ida ne'e nia laran. Ha'u foin fila husi Amérika, vizita ba nasaun seluk, ne'ebé ha'u presiza konsulta didi'ak lai," dehan MNEK, ba jornalista, iha PN, Kinta (10/10/19).

Nia akresenta, lista embaixadór/a ne'ebé Prezidente Repúblika haruka fila laiha problema.

"Lista laiha problema. Maibé, presiza hadi'a ida ka rua. Para halo ajustamentu depois haruka ba Primeiru Ministru, depois haruka ba PR. Maibé, ida ne'e laiha problema," MNEK afirma.

Entretantu, tuir lista kandidatu embaixadór/a sira ne'ebé mak seidauk hetan pose husi PR mak hanesan:

1. Ines Maria de Almeida, Embaixadora ba Camberra, Austrália
2. Gil da Costa, Embaixadór ba Reinu Unidu Gra-Britania no Irlandia Norte
3. José Luis Guterres, Embaixadór ba Konfederasaun Suisa
4. Paulo Assis Belo, Embaixadór ba Repúblika Mosambike
5. Isabel Amaral Guterres, Embaixadora ba Lisboa, Portugál
6. Isabel Amaral Guterres, reprezentante permanente TL ba Sekretariadu Ezekutivu CPLP
7. Isabel Amaral Guterres, Embaixadora la rezidente TL ba Repúblika Kabuverde.
8. Maria Natalia Guterres Viegas Carrascalão, Embaixadora ba Singapura
9. Ilidio Ximenes da Costa, Embaixadór ba Japaun
10. Hermenegildo Lopes, Embaixadór ba Kambodia
11. Abrão dos Santos, Embaixadór ba Repúblika Populár Xina
12. Joana Veneranda Amaral, Embaixadora ba Santa Sé
13. Armandina Maria Gusmão dos Santos, Embaixadora ba Reinu Tailándia.

Tempotimor (Dili) – Komisaun F ne'ebé trata asuntu saúde, seguransa sosiais no igualidade jéneru semana oin sei ba foti dadus kona-ba vítima sira ne'ebé iha semana semana liubá, hetan afetadu inséndiu iha Munisípiu Ermera, Likisa, Aileu no Bobonaro.

"Ohin, ami mós ko'alia kona-ba akontese ahi han uma iha Ermera, Likisa, Aileu no Bobonaro. Parlamentu Nasionál liuhosi reuniaun lideres bankada nian, preokupa ba dezastre ne'e. Tan ne'e, Komisaun F iha semana oin, sei ba baze hodi haree situasaun ne'e no rekolla dadus," tenik Prezidente Parlamentu Nasionál,  Arão Noé de Jesus da Costa Amarál, iha PN, Kinta (10/10/19).

Nia afirma, bainhira dadus iha ona, PN sei halo audiénsia ho Governu liuliu ministériu tutela, hodi apoiu vítima sira.

"Komisaun ba foti dadus akontesimentu ne'e tomak para ita haree nesesidade saida mak populasaun sira presiza, nune'e para halo audiensi ho governu liu-liu ministériu ne'ebé tutela ba bele fó asisténsia tanba agora besok ona udan, entaun presiza iha uma mohon ba vítima sira ne'ebé sofre husi inséndiu ne'e" dehan Arão.

 Hein Investigasaun

Alende ne'e, Governu liuhosi Sekretáriu Estadu Protesaun Sivíl (SEPS) fó ona apoiu emerjénsia ba vítima hamutuk 199 husi Munisípiu Ermera, Likisa, Aileu no Bobonaro ne'ebé afetadu husi inséndiu.

"Dezastre Naturais iha Munisípiu Ermera, Likisa, Aileu no Bobonaro dadus atuál hamutuk 572. Husi dadus hirak ne'e, ita fó ona apoiu emerjénsia iha 199. Sei kontinua iha levantamentu dadus," dehan Sekretáriu Estadu Protesaun Sivíl (SEPS), Alexandrino dos Santos iha Palásiu Governu, Kuarta (09/10/19).

Tuir SEPS katak, kazu inséndiu ne'ebé akontese iha Ermera hola parte ona krime ambientál. Tanba ne'e, sei hein investigasaun.

"Kazu inséndiu ne'e ita servisu hamutuk ho PNTL ne'ebé fó ona ordem no kontaktu ona mós ba Sekretáriu Estadu  Ambiente (SEA), hodi haree. Tanba sunu rai, ema ida de'it nia hahalok iha vítima kuaze atus resin. Tanba ne'e, tama ona iha krime ambientál. Nune'e ita koopera ona ho PNTL hodi halo investigasaun" dehan SEPS.