"Taxa ezekusaun reál OJE 2021 ba Governu Sentrál to’o iha sesta, 31 Dezembru 2021, atinje billaun US$1.4 ka 73% husi totál OJE Retifikativu billaun US$2.1”, deklara Ministru Rui iha pájina ofisial Gabinete Ministru Finansas ne'ebé www.tempotimor.com asesu iha segunda (03/01).
Bazeia ba taxa ezekusaun ne'e, Ministru Finansa, Rui Gomes deside aprezenta ba Primeiru Ministru (PM), Taur Matan Ruak, kona-ba progresu ezekusaun OJE 2021 to’o 31 Dezembru 2021.
Iha ne'e Taxa ezekusaun reál ne'e la'o tuir klasifikasaun ekonómiku, aas liu mak iha kategória Transferénsia Públika millaun US$654,1 ka 93,4% husi orsamentu alokadu millaun US$700,4 tuir kedan ho Saláriu no Vensimentu milliaun US$217,8 ka 92,8% husi orsamentu alokadu millaun US$234,9.
Ba Despeza Kontijensia konsege ezekuta millaun US$9,2 ka 86,1% husi orsamentu alokadu millaun US$10,7. Bens no Servisus ezekuta millaun US$402,4 ka 69,1% husi orsamentu alokadu millaun US$582,5. Kapitál Menor ezekuta millaun US$43,8 ka 68,6% husi totál orsamentu alokadu millaun $63,8.
Enkuantu Kapitál Dezenvolvimentu konsege ezekuta de’it millaun US$90,3 ka 26,6% husi orsamentu alokadu millaun US$340,1. (*)