“Governu ninia modelu foun orsamentasaun agora ne'e, orsamentu ne'e na baze de programa, entaun ita haree liuba rezultadu, ita la sura osan hira mak ita gasta, tanba parte prinsipiu que osan ne'ebé ita prefere gasta osan di'ak duke gasta ladiak”, dehan Taur iha palásiu prezidensiál Bairopite, kinta (05/08).

Maske Orsametu Jerál Estadu (OJE) nian ba tinan 2021 ho montante billaun US$1.6 ne'ebé hetan ona aprovasaun husi lei númeru 14/2020 loron 29 fulan-dezembru tinan 2020 hodi hahú permite nia ezekusaun iha loron 11 fulan-janeiru 2021, maibé nia ezekusaun foin atinje pursentu 32,8 (32,8%).

Tanba orsamentu bainhira gasta lahotu haruka fali ba kofre estadu, ne'e laiha problema, maibé gasta tenke di'ak.

“Ita-boot sira haree uluk ha'u sei Prezidente Repúblika ha'u halo diskusaun iha Parlamentu dehan, la'ós gasta hira, gasta ba saida, entaun fokus ba rezultadu, ida ne'e mak ezijénsia ne'ebé governu nian ba Ministru hothotu”, dehan nia.

Antes ne'e, PM Taur deklara, Orsamentu Jerál Estadu (OJE) tinan 2021 la ezekuta hotu sei haruka fila ba kofre estadu.

Orsamentu jerál estadu dadaun ne'e iha faze avaliasaun iha rezultadu e la'ós de'it ba nível ezekusaun orsamentál maibé ligasaun mós ho ezekusaun orsamentál ne'ebé sei iha faze diskusaun maka’as.

“Agora nível global pursentu 32,8 e ami fiar katak ba oin ninia fulafulan  ezekusaun ne'e sa'e, mais la bele iha garantia katak to'o iha fin do ano ne'e, ita bele ezekuta hotu ne'e normál, naturalmentame ida ne'ebé  la ezekuta hotu bele ba fali kobre estadu”, dehan Taur. (*)