Tuir informasaun ne’ebé www.tempotimor.com asesu iha pájina AIFAESA, kinta (30/06) katak, objetivu husi selebrasaun Misa ne'ebé prezide husi Pé. Júlio Crispin ne'e, atu hasa'e agradesimentu no halo refleksaun ba misaun tomak ne'ebé Ajénsia Estadu ne'e hala'o durante tinan neen (6) nia laran, atividade ne'e rasik partisipa husi orgaun AIFAESA, Inspetór Jeral, Ernesto Monteiro, no Sub Inspetór Jerál, Dionisio Neto, Kargu Xefia no funsionáriu sira hotu.

Iha reflesaun ne'e, Pé. Júlio Crispin hatete, AIFAESA ejiste ona tinan neen (6) hodi hahú aprende ona hakat no haree buat hotu ne'ebé los no buat ne'ebé lalos katak hatur lolos buat sira ne'ebé los no hasai buat sira ne'ebé mak lalós nu'udar servidór no salvadór ba ema hothotu atu moris ho saudavel no halo ema sira kumpri lolos ba nia kna’ar sira iha atendementu ba públiku.

Tanba ne’e, husu ba AIFAESA tenke hadomi estadu ida-ne'e, tenke tau Matan ba Povu ida ne'e, liuhusi asaun sira ne'ebé AIFAESA rasik halo nu'udar nia kna’ar sira iha ámbitu inspesaun no fiskalizasaun ba atividade ekonómika hotu hodi halo kontrolu másimu ba ai-hán sira ne'ebé ema hotu konsumu.

Iha Bibi atan ne'e mós husu ba Funsionáriu hotu iha AIFAESA, tenke iha sentidu Patriotízmu no Sentidu Servidór hodi kontribui ba dezenvolvimentu iha setór hotu liu iha setór ekonómia, saúde, industria, turízmu no seluk tan ne'ebé AIFAESA tau Matan ba hodi sai eroi foun iha Nasaun ida-ne'e. Nomós esperansa povu nian iha AIFAESA, tanba ne'e AIFAESA tenke iha kualidade servidór ne'ebé di'ak.

Iha selebrasaun ne’e, hato'o mensajen ba AIFAESA, tenke servisu iha ekipa, servisu hamutuk, desizaun hotu tenke mai husi hanoin sira hothotu, tenke disiplina no tenke iha karater respeita malu atubele iha való servisu ne'ebé kualidade, efisiénsia no efikásia.

Hafoin selebrasaun misa ne'e, Superior másimu ba Institutu Públiku AIFAESA, Inspetór Jerál, Ernesto Monteiro, Agradese ba Pé. Júlio Crispin ne'ebé prezide misa refere no halo refleksaun iha umilia ne'ebé fó hela mensajen lubun ida hodi AIFAESA nafatin garante kualidade servidór ne'ebé di'ak.

Inspetór Jerál mós hatete, AIFAESA iha protidaun atu nafatin hala'o nia kna’ar sira hodi garante defesa ba konsumedór no promove konkorénsia Leal entre Operadór ekonómika sira. (*)