"Servisu organizasaun urbana nian mai partilla konteudu husi dekretu lei nú.02/2017 ne'ebé ko'alia kona-ba jestaun rezidou sólidu urbanu nian, para oinsá entidades, sosiedades sira bele iha ona konsensia atu kontrola no koloka lixu iha nia fatin," dehan Diretóra Nasionál Organizasaun Urbana, Maria Vareti Marques Belo iha salaun apuramentu Baukau, tersa (24/05).
Tanba, lixu ne'ebé naklekar iha dalan públiku no komunidade sira sunu iha lixu fatin ne’e, sei fó impaktu negativu ba ema nia saúde.
Nune’e, sansaun sira ne’ebé konsagraga ona iha dekretu lei nú.02/2017 katak, bainhira komunidade so'e lixu arbiru no sunu sei multa osan ho valor husi US$50 to'o US$115.
"Iha konteudu dekretu lei nian mós hatur iha ne'eba katak, wainhira sistema jestaun rezidou sólidu urbanu nian seidauk implementa mak seidauk bele rekolla taxa no aplika multa," nia informa
Nune'e, sosializasaun ba dekretu lei nú.02/2017 iha nível Munísipal remata, hafoin hahú implementasaun multa.
"Vantajen husi dekretu lei ne'e, garante ita nia ambiente moos, kontribui ba saúde di'ak no poder lokál ne'ebé ita hotu mehi, kaundu sidade la moos fo’er sabraut, ha'u hanoin difísil atu kompete ba poder lokál," nia argumenta
Xefe Suku Buruma, Liborio Dos Santos Freitas, agradese ba MAE, tanba bele involve autoridade lokál sira hodi partisipa iha semenariu ne’e, hodi kontribui ideias halo jestaun ba lixu iha Munísipiu Baukau.
"Semináriu ohin ne'e fó oportunidade ba ita Baukau oan sira fó hanoin hamutuk haree ba lixu iha Baukau laran, nune’e sidade Baukau sai furak," nia hatete
Enkuantu partisipa iha sosializasaun dekretu lei ne’e, kompostu husi diretores liña ministériu iha Baukau, inklui xefe suku sira ne’ebé pertense ba postu administrativu Baukau vila. (*)