"Ita iha ne'e 4 tón fini forekeli, ita atu distribui, maibé forekeli ita kuda iha tempu hanesan ne'e labele, tanba udan sei makas, udan menus mak ita kuda, ne'ebé ita prepara ba distribuisaun ba suku ne'ebé poténsial kuda forekeli," dehan Diretór Servisu Agrikultura Munisípiu Baukau Moises Lobato Pereira iha kna'ar fatin vila nova, tersa (23/03).
Tuir planu sei distribuisaun ba fatin ne'ebé iha área médiu liuhusi identifikasaun ba Postu Adminisitrativu Vemase, Venilale, Kelikai no Baguia.
"Fatin sira ne'e poténsial para ita bele kuda forekeli, durante ne'e ita akompaña kelikai ho venilale," nia akresenta
Tuir kalkulasaun, kilograma 25, sei kuda ba to’os hektar-ida, maibé depende fali ba to’os na'in sira kuda, tanba balun kuda musan ida, to'o musan tolu depende ba rai nia bokur.
"Depende ba área, ema ne'ebé área boot ita fó, maibé ema ne'ebé interese ita fó liu," nia informa
Maibé, iha Munísipiu Baukau, komunidade barak hahú hakarak promove forekeli, tanba dadaun demanda husi forekeli sa'e makas iha merkadu.
Benefisiu husi forekeli iha nutrisaun makas ba proteina nian, tanba ne'e governu tau planu makas atu produs forekeli sai susuben, sei fó benefisiu ba labarik no ema boot ne'ebé ma-nutrisaun.
Alende ne’e, forekeli sai matérial prima hodi produs sai fali tau tempe ho nia ten sai hahan ba fahi, no forekeli tahan ho kain sai nutrisaun di'ak ba rai, tanba bele produs netrujen ba rai.
Medida kuda forekeli, 25x30 cm 30x30 cm, 40x30 cm, depende ba rai nia bokur.
"Rai bokur ita kuda distánsia dook, (40x30 cm) para bele simu sirkulasaun anin sirkulasaun loron, sé rai ne'ebé krekas ita kuda besik (25x30 cm)," nia informa
Tuir planu sei fahe fini forekeli ba to'os na'in sira iha Munísipiu Baukau iha fulan-maiu tinan-2022. (*)