"Natar ne'e 125 mak funsiona, natar balun abandona, tanba foin dadauk mota mak sobu irigasaun naran luge'e," dehan Administradór Postu Adminisitrativu Laga, Domingos Loiola José Pereira liuhusi via telefone sabado (02/04)
Nune'e, Suku liuhusi postu relata kedas pedidu ba Servisu Agrikultura Munísipiu Baukau, maibé atendimentu tarde, entaun natar balun tenke abandona.
"Agora dadaun (natar ne'ebé abandona) sei bele funsiona, tarde no prezisa tán traktor halai natar ruma husi estadu, halo de'it labele," nia hatete
Alende ne’e, husi fulan-janeiru to'o marsu tinan-2022, natar hektar-3 mak iha Postu Laga Vila hetan estragus, tanba besik mota ninin.
Xefe Suku Soba, Francisca Monica de Fatima Soares, hatete, komunidade iha vontade atu halo natar, maibé irigasaun ladi'ak sai preukupasaun, enkuantu bee dalan ba natar sira balun hetán estragus husi mota, nune'e halo komunidade dezanima hakbesik ba natar, maibé tinan-2022 komunidade balun hahú esforsu aan funsiona natar.
"Ami nia proposta husi Suku ba Postu Administrativu, iha Postu ba Munisípiu, relata ba Ministéiru Agrikultura no Peskas (MAP) haree ba preukupasaun natar na’in sira nian, maibé difisil tebes atu atende, nune'e komunidade nia natar balun kontinua abandona," nia argumenta
Enkuantu irigasaun Luge'e iha Suku Soba tama ona ba faze survey husi UNDP, hamutuk ho Diretór Servisu Agrikultura Munisípiu Baukau, bainhira hetan konstrusaun sei fornese bee ba natar hektare 300 resin iha Suku Soba, no seluk tán.
Entertantu Postu Administrativu Laga iha Suku 8 hanesan, Atelari, Libagua, Nunira, Saelari, Sagadate, Salamari, Soba no Tekinaumata ho Aldeia 52, Xefe família 4.656, totál populasaun 22, 486. (*)
