Tempotimor (Dili)-Deputada Bankada opozisaun Congresso Nacional de Reconstrução de Timor (CNRT), Venerand Lemos Martins, krítika Governu laiha neon hodi hadau rai no edifísiu eis mezeun Komoro husi juven sira iha Asosiasaun Arte Moris.

"Ha'u lori bankada CNRT nia naran hakarak hato'o solidaridade ba arte moris, ne'ebé horseik Governu de faktu ida ne'e, halo despeisu obrigatóriu iha sira-nia fatin Komoro. Ha’u lamenta tebes ho hahalok ida ne'e, Governu ne'e hanesan neon laiha. Hahalok ne’ebé hatudu ka hases, dudu ses tiha artista no pintura timoroan sira husi Arte Moris ninian, halo ita triste tebe-tebes”, dehan Deputada Veneranda iha nia intervenaun iha debate Orsamentu Jerál Estadu 2022, plenária PN, kinta (02/11).

Bankada CNRT haree katak fatin ne’ebé juventude Arte Moris utiliza hodi hamahan-an ba ne'e desde, tinan 18 ona, maibé derepente de'it iha loron 1 fulan-dezembru Governu obriga sira hodi soe sai joven sira-nia sasán.

Maske joven Arte Moris durante ne'e pinta  erói, veteranu, no luta na'in sira, ho sentimentu tomak no sira hasai hotu sira-nia espresaun, arte ba pintura ida, maibé Governu laiha neon hodi soe estraga sira-nia sasán no pior liu Governu halo despaisu obrigatóriu sein fó medida ruma, fatin no alternativa ruma atu sira bele hela.

"Governu ko’alia barak tebtebes dehan tenke konserva arte no kultura, maibé despeisu obrigatóriu ne’ebé hasoru Arte Moris, hatudu katak Governu ida ne’e laiha sensiebilidade oituan ba jove sira ne’ebé hakarak atu hasai sira-nia talentu liuhusi Arte Moris ida ne'e”, afirma nia. (*)