“Ami sente haksolok tebes atu organiza Akampamentu Tékniku ida ne 'e, iha momentu krítiku ida ne' e. Pandemia COVID-19 lori ona dezafiu krítiku ne'ebé hamosu impaktu dezinformasaun ba sidadaun sira iha ita-nia nasaun rua ne 'e kada loron”, dehan enkaregadu Negósiu Embaixada EUA, Tom Daley iha Timor Lodge, sabadu (23/10).
Akampamentu téknika ne 'e hala’o ho kolaborasaun hamutuk ho Asosiasaun Jornalista Timor Lorosa’e (TLJA) no Timor-Leste Press Union (TLPU) no ho apoiu finansiamentu husi Ministériu Negósiu Estranjeiru EUA nia Departamentu ba Asuntu Edukasional no Kulturál.
Haree ba programa ne’e hanesan ba dala uluk kona-ba Akampamentu Téknika nian ne’ebé hala’o iha Timor-Leste.
"Akampamentu Tékniku ne 'e halibur jornalista Timoroan foinsa’e liu 50 iha Dili ba programa ne' e, ne’ebé hala’o iha loron 16,17 no 23 fulan-Outubru. Partisipa virtualmente husi Estadus Unidus, Indonézia no Filipina, treinadór jornalista senior na'in-4 fahe koñesementu no esperiensia no diskute prátika di'ak liu hodi hametin jornalizmu investigativu ne’ebé bazeia ba realidade iha Timor-Leste hodi luta kontra dezinformasaun”, esplika nia.
Jornalista Timoroan sira ne’ebé partisipa iha programa ne'e hetan ‘fini finansiamentu’ hafoin hala 'o Akampamentu Téknika hodi fó apoiu liu tanba esforsu lokál nian atu hametin atividade verifikasaun faktu.
“Sosiedade demokrátiku sira hari’i bazeia ba direitu no liberdade espresaun. Maske nune'e, liberdade ne’e dala barak utiliza atu kria istória falsu no rumores, dalabarak ho konsekuénsia ne'ebé seriu. Tanba ne'e, importante tebes ba jornalista sira atubele hatene identifika informasaun ne'ebé laloos iha notísia nomós mídia sosiál”, afirma nia.
Jurnalista senior ne’ebé envolve iha Akampamentu Tékniku ne’e mak hanesan Deborah Nelson, Profesór ba Jurnalizmu Investigativu husi Universidade Maryland, Aribowo Sasmito, Co-Fundadór no Espesialsta Verifika Faktus husi MAFINDO, organizasaun la'ós lukrutivu ne’ebé harii ba kombate dezinformasaun, Karol Ilagan, Editorial Director husi Philippine Center for Investigative Journalism no Wahyu Dhyatmika, Editor-in-Chief of Tempo.co.
Akampamentu Tékniku mak programa ida ne’ebé organiza husi Ministériu Negósiu Estranjeiru EUA nia Departamentu ba Asuntu Edukasional no Kulturál.
Tanba ne’e hala'o iha nasaun sira atu fasilita ligasaun entre partisipante sira ho espesialista teknolojia sira atu kria solusaun teknolojia inovativa no hari’i abilidade dijital hodi kria solusaun konkreta ba dezafiu real mundu nian. (*)