"Ohin ita mai iha ne'e sai sasin ba serimónia asinatura akordu entre MEJD ho BNCTL kona-ba atu loke konta bankária, ao mesmu tempu oinsá mak transfere ba BNCTL Orsamentu do estadu liuhusi MEJD ba OJE 2021 ne'ebé aloka ba konstrusaun infraestrutura edukativu, liuhusi transferénsia públiku”, dehan Ministru Edukasaun Juventude no Desportu, Armindo Maia, iha salaun MEJD, Vila Verde, kuarta (06/10).

Eskola iha teritóriu tomak ne'ebé atu halo reabilitasaun konstrusaun hamutuk 204, sala aula 657, ho totál Orsamentu, US$20.887.696.76.

"Ne'e orsamentu sira atu hadi’a ita-nia eskola, iha teritóriu Timor laran tomak, prosesu ne'e la'o kleur ona, espera fulan ida tan hanesan ne'e balu-balun bele hahú ona, bainhira tama iha 2022 karik fulan-Marsu ka Abríl hanesan ne'e hothotu bele remata ona”, dehan nia.

Ministériu deside fó konfiansa ba BNCTL tanba hanesan banku Estadu Timor-Leste ninia, konserteza iha konfiansa no responsabilidade no fiar katak BNCTL sei jere didi’ak osan ne'e.

"No Espera katak kooperasaun ne'e la'o di'ak, atu nune'e ita bele tulun lalais ita-nia labarik sira iha área ruarál ne'ebé presiza eskola ne'ebé di'ak, atu nune'e ita hakarak edukasaun ne'ebé di'ak ba ita-nia oan sira”, dehan nia.

Diretór Ezekutivu BNCTL, Brigido de Sousa, apresia ba MEJD ne'ebé iha konfiansa ba BNCTL hodi servisu hamutuk atu hadi’a futuru labarik sira ho osan montante ne'ebé boot.

"Maske iha banku haat ne'ebé eziste iha Timor-Leste, maibé Ministériu fó konfiansa ba BNCTL, nune'e ami apresia no agradese wain ba kooperasaun ida ne'e, hodi ita servisu hamutuk atu hadi’a futuru labarik sira nia, ho orsamentu ne'ebé boot hodi rai iha BNCTL atu halo transferénsia ba konstrusaun eskola sira iha teritóriu tomak”, afirma nia. (*)