“Ha’u sente hakfodak oituan, tanba ami iha ne'e laiha eskola online ida, no derepente de'it profesór sira dehan dia 23 ami ezame, entaun ami preokupa”, dehan nia iha Eskola ESG 5 de Maio Bekora, sábadu (07/08).
Tanba, situasun covid-19 durante ne'e, sira laiha oportunidade atu asesu ba materia foun, hodi kompara ho eskola sira seluk ne'ebé simu materia liuhusi online.
Nune'e, sira ne'ebé asesu ba online ne'e kontinua asesu maibé ida ne'ebé la asesu ba online kontinua estuda de'it materia ne'ebé antes ne'e profesór sira fó ona.
Estudante, Alarico Maria de Jesus, deklara nia parte triste, tanba eskola deklara atu realiza ezame ba periodu daruak, maibé kadan sira la hetan materia.
Diretór Ensinu Sekundáriu Jeral (ESG) 5 de Maio Bekora, Manuel Verdial hatete, kona-ba kestaun materia ne'e, Ministériu Edukasaun Juventude no Desportu (MEJD) liuhusi Diresaun Unidade Korrikulu Nasionál Edukasaun (DUKNE) prepara ona no hein de’it oinsá mak eskola bele orienta halo rezumu ida.
Bainhira Dili kontinha aplika serka sanitária, mak eskola sei halo ninia estratejia atubele aproveita halo esplikasaun ba estudante ka traballu ba uma nian oinsá mak garante kapasidade estudante atu tuir ezame iha loron 23 fulan-agostu.
“Primeiru kedas ha’u garante tanba, materia ne'e ami fó tiha ona iha estudante sira-nia liman”, dehan nia.
Tanba eska kompriende kondisaun estudante siea maioria povu kbi’it la’ek ninia oan, laiha kbi’it atu asesu telefone android no difikulta sira asesu ba online.
Enkuantu totál estudante iha ESG 5 re Maio, hamutuk 2.136 husi estudante klase dahuluk to'o klase datolu, no aula ne’ebé utiliza hamutuk 13. (*)