"Tuir kaléndariu husi Ministru Administrasaun Estatál atu hala'o iha 18 ba oin, mais tanba manúal programa merenda eskolar ne'e foun, ninian prosedementu no sistema fornesementu mós foun, teknikamente liuliu ba Munisípiu Baukau seidauk bele implementa", dehan Diretór Servisu Edukasaun Munisípiu Baukau, Augosto Ornai Ximenes ba www.tempotimor.com iha kna'ar fatin, Kuarta (11/01).
Nune'e, seidauk halo preparasaun masimu, maibé sei esforsu atu halo preparasaun iha tempu badak, atu bele hahú implementa programa merenda eskolar.
"Enkontru preparasaun ba implementasaun programa merenda eskolar ne'e ita sei hahú iha dia 16 ne'ebé mai", nia relata.
Tanba, liuhusi enkontru mak sei orienta diritivas eskola sira, atu forma ékipa jéstaun programa merenda eskolar iha nivel eskola hodi halo kontratu ho fornesedór sira ba programa merenda eskolar iha nivél Munisípal.
"Tanba ne'e provizóriumente ita seidauk bele hahú, maske bazeia ba orientasaun gabineti avaliasaun dezenvovlimentu kurikular, katak dia 09 ne'e hahú ona inisiu ano eskolar ba tinan-2023, mais programa merenda eskolar ita seidauk bele hala'o, tanba teknikamente ita seidauk preparadu", nia hatete.
Entretantu, orsamentu ba programa merenda eskolar ba tinan-2023 nian, Ministéru Administrasaun Estatál kanaliza liuhusi Autoridade Munisípiu Baukau hamutuk US$951.934.50 ba loron efetivu 164 nian, aloka ba eskola hamutuk 309, ne’ebé kompostu husi eskola Katóliku, eskola fundasaun, inklui eskola Públiku, tuir planu kada estudante loron ida han osan merenda eskolar nian US$0,42 centavus. (*)
