Mosu dualizmu entre Federasaun Nasionál Basketból Timor-Leste no Federasaun Basketból Timor-Leste, parte rua hakarak hotu atu ukun iha organizasaun desportu basket nian bainhira ida-idak manetin ho legalidade ukun.

Nune'e, obriga Governu liuhusi Sekretariu Estadu Juventude no Desportu ne'ebé tau matan ba atividade desportu iha Timor-Leste, tun dereitamente atu buka solusaun liu husi dalan diálogu entre FNBTL no FBTL.

Nune'e, SEJD, iha Sesta (14/8), halo soru-mutu ho parte FNBTL ne'ebé lideradu husi atuál Sekretáriu Estadu Protesaun Sivil, Joaquim Gusmão dos Reis Martins hamutuk ho estrutura rona hanoin no buka solusaun ba problema iha federasaun basket laran.

"Ohin rona FNBTL nia hanoin kona-ba dualizmu iha basketból, uluk ha'u rona ona husi FBTL. Tanba antes ha'u simu kargu ne'e mosu dualizmu iha basket nian, ne'ebé rona fali sira oinsá atu halo diálogu no tuur hamutuk," dehan Abrão, iha knaar fatin, Lesidere, Sesta (14/8).

Abrão hateten, daudaun ne'e seidauk iha solusaun entre FNBTL ho FBTL, maibe importante tuir Abrão, sei buka solusaun atu problema dualizmu iha federasaun basket la afeta ba jogadór sira.

Abrão esplika, atividade desportu iha nia lei rasik hanaran dekretu lei utilidade desportiva, kada organizasaun desportiva ne'ebé atu hetan apoiu husi Governu tenke iha atribusaun utilidade desportiva.

"Agora daudaun ami halo hela prosesu la'ós de'it basket, maibé federasaun hotuhotu atu mai hatama rekerimentu hetan utilidade desportiva, husi ne'e sé mak hetan utilidade desportiva mak hetan apoiu husi Governu," nia esplika.

Iha fatin hanesan, Prezidenti FNBTL, Joaquim Gusmão dos Reis Martins hateten ezisténsia FNBTL kle'ur no liuhusi kongresu realiza iha Novembru 2019 ne'ebé partisipa mós husi federasaun internasionál basketból, inklui Governu liuhusi notariadu, nune'e prezensa FNBTL iha SEJD atu hato'o kronolójia inklui buka solusaun ba problema dualizmu iha federasaun basket.

Atual Sekretariu Estadu Protesaun Sivíl salienta katak, FNBTL hakarak haree ba parte legalidade atu bele iha baze ne'ebé forte hodi kontinua kria kompetisaun basket iha Timor-Leste.

Entertantu, antes ne'e, SEJD rasik rona ona husi parte FBTL ne'ebé lideradu husi Constantino Soares, nune'e SEJD rasik hafoin rona hotu husi parte rua sei sujere ba komisaun nasional desportu atu halo diálogu hodi buka solusaun. (*)