"Suku liurai iha nia aldeia ualu, maibé husi aldeia 8 ne'e, aldeia hitu maioria asesu hotu ona liña eletrisidade, maibé iha aldeia ida fatubesi ho totál uma-kain 113 seidauk asesu liña eletrisidade, ida ne'e mak difikuldade ida ne'ebé ha'u-nia komunidade enfrenta”, dehan Xefe Suku Liurai, Elio Dias Gomes, iha aldeia Quirilelo, kuarta (15/09).
Komunidade sira ne'ebé seidauk asesu liña eletrisidade ne'e, iha tempu kalan sira ne'ebé iha kbi’it sosa solár panel ne'e uza solár panel, maibé ba sira ne'ebé kbi’it la to’o ne'e uza de'it lampu tradisionál hanesan kami.
Nu'udar líder komunitária hato'o ona proposta ba parte relevante kona-ba asuntu hirak ne'e, maibé seiduak iha rezultadu ne’ebé pozitivu.
"Ita espera tinan (2022) oin mai ha'u-nia komunidade mós asesu hotu ona liña eletrisidade, tanba VIII Governu nia programa katak antes mandatu remata territóriu nasionál hothotu asesu ona ba liña eletrisidade”, dehan nia.
Iha suku Liurai totál populasaun hamutuk 4.000-resin, ho nia aldeia ualu hanesan, Bandeira-Hun, Couladon, Fatulmau, Rairemu, Raimansu, Quirilelo, Fatubesi no Laklo. (*)