Tempotimor (Dili)-Deputadu husi bankada Partidu Libetasaun Popular (PLP) Sabino Guntur konsidera daudauk ne'e veteranu sira iha hela faze presaun psikolojia nia laran tanba sira moris kiak no laiha kbiit atu muda sira-nia moris.

Tuir deputadu Guntur, sistema governu ne'ebé eziste durante ne'e la fó espasu ba veteranu sira atu partisipa iha prosesu dezenvolvimentu.

Nia dehan, governu tenke kria kondisaun ba veteranu sira atu moris ho dignu.

Durante ne'e, Guntur hatutan, veteranu balun kansela no hada'u-malu projetu tanba sistema ne'ebé iha la fó espasu ba sira.

"Veteranu sira halo hanesan ne'e (kansela no hada'u-malu projetu), tanba sistema la fó espasu atu sira partisipa iha prosesu dezenvolvimentu, entaun fó presaun ba sira-nia psikolojia, konserteza ho emosaun bele kansela projetu," dehan Guntur iha parlamentu nasional, Kinta (05/03).

Deputada ne'e dehan, bainhira governu izola veteranu ne'ebé luta tinan 24, konserteza sira ho emosaun bele aplika atetude ne'ebé ladun satisfas ema barak nia hakarak.

Nia afirma, daudauk ne'e veteranus iha hela faze presaun psikolojia nia laran, tanba sira-nia moris mukit no kbiit laiha atu envolve iha sistema administrasaun hodi muda sira-nia moris.

"Ho razaun hirak ne'e mak akontese iha suku balu veteranu hamosu buat ida kanselamentu ba projetu," nia hatete tan.

Guntur dehan, veteranu sira buka projetu tanba konsidera projetu mak hanesan toos no natar.

Atu hadia buat hirak ne'e, tuir nia, governu presiza kria kondisaun di'ak no hadia sistema atu bele dignifika veteranu sira-nia moris.

"Governu tenke hadi'a sistema par bele dignifika veteranu sira-nia moris, atu bele goza moris ho hakmatek hodi labele envolve iha projetu ruma," katak nia.