Tempitimor (Dili) - Primeiru Ministru, Taur Matan Ruak, kongratula koligasaun foun ne'ebé lider husi Partidu CNRT no partidu lima seluk atu forma governu.

Atualmente CNRT lidera ona koligasaun foun ho kadeira 34. Maski nune'e, antes ne'e CNRT mós lidera koligasaun Aliansa Mudansa ba Progesu (AMP) ho kadeira 36, maibé ikus mai naksobu tanba laiha intendimentu entre partidu sira iha koligasaun laran.

Maski koligasaun foun ne'e seidauk hatama ofisialmente ba Xefe Estadu, maibé Primeiru Ministru hakarak solisita ninia kongratulasaun no espera atu koligasaun foun bele metin no dura ba tempu naruk.

"Ha'u espera ke sira konsolida-aan metin no fo dalan ba pasu foun," dehan PM, Taur Matan Ruak, iha Palásiu Prezidensiál, Bairru-Pité, Kinta (5/3).

Eis-Xefe Estadu ne'e konsidera Timor-Leste presiza orsamentu no programa para kontinua hakat ba oin nune'e labele kontinua ho orsamentu duadesimu.

Entertantu, VIII Governu Konstitusun ne'ebé lidera husi Taur Matan Ruak ofisialmente intrega ona demisaun ba Prezidente Repúblika, Francisco Guterres Lu Olo, maibé to'o agora seidauk iha desizaun husi Prezidente Repúblika.