Enkaregadu Negósiu Embaixador EUA ba Timor-Leste, Tom Daley, hatete, durante fulan tolu ikus ne'e, ékipa konjunta husi forsa EUA no F-FDTL asegura ona aeroportu ne'e liuhusi harii lutu perimetru ba F-FDTL nia komponente.
"Faze ínisia husi reabilitasaun ne'e, preparasaun ida atu simu aviaun vijilánsia Cessna de ultima jerasaun ne'ebé sei to'o mai iha ne'e tinan ida ne'e nia laran no ida ne'e apenas inisiu husi ami nia apoiu," dehan Tom Daley iha Komponente Terrestre Baukau, kinta (07/04).
EUA kontinua parseria ho TL atu halo reabilitasaun konjunta ba Aeroportu Baukau, sei hadi'a hikas tore kontrolu Aero, instala lampu iluminasaun pista iha Aeroportu laran, inklui konstrui tán aviaun para fatin ba aviaun Cessna.
Projetu ne'e, sei permite TL halo monitorizasaun diak liután iha teritóriu nasionál, responde ba dezasre naturál, alende mós promove dezenvolvimentu ekonómiku.
"Liuhusi ita nia parseria, espera Timor-Leste sei pozisionadu ho diak liután atu defende nia sidadaun sira, proteje soberania no promove nia interese nasionál rasik," nia hatete
EUA mós sei fornese ékipamentu no veíkulu ba Timor-Leste hodi apoia nia operasaun sira iha Komponente Aéreu F-FDTL nian, kompostu kamioneta bombeiru-ida, karreta hamos pista, kareta Ford 350s-2, forklift-ida, kamioneta combustível-2.
Enkuantu asina memorandu entendimentu entre Governu TL ho EUA ba reabilitasaun Aeroportu Baukau, iha loron 28 fulan-juñu tinan-2021, atu apoiu setór aviasaun sivil iha TL.
Armazén refere ho medida 477 metru kuadradu iha Aeroportu Baukau ne'e, hanesan parte husi faze dahuluk projetu reabilitasaun ho orsamentu millaun $10.6 husi Estadus Unidus.
Projetu ne'e, konstrui husi ékipa konjunta enjeñeiru militár EUA membru 554th Red Horse Squadron na'in-15 mak servisu hamutuk ho enjeñeiru F-FDTL na'in-29.
Lansamentu primeira pedra ba Aeroportu Baukau iha loron 27 fulan-jullu tinan-2021, husi eis embaixadór EUA, Kevin Blackstone, eis xefe estadu maior jeneral F-FDTL, Lere Anan Timur no Primeiru Ministru, Taur Matan Ruak.
Nune'e, Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul 'Falur Rate Laek' husu Governu, atu dezenvolve komponente Aero nian hodi bele fó apoiu ba situasaun kalamidade, inklui pandemia sira.
"Nune'e bele halo evakuasaun ba Ospitál Nasionál, ba sentru saúde sira halo vizilansia maritima, iha momentu karakter urjensia," nia hatete
Entertantu partisipa iha seremonia Inagurasaun faze dahuluk reabilitasaun kontinua ba Aeroportu Baukau, partisipa husi Ministru Defeza Filomeno da Paixão de Jesus, Ministru Transporte no Komunikasaun, José Agustinho da Silva, Enkaregadu Negósiu Embaixada EUA, Tom Daley, inklui mós entidade sira iha Munisípiu Baukau. (*)