Tempotimor (Dili) - Loron daruak plenária debate proposta Orsamentu Jerál Estadu (OJE) tinan fiskál 2020 hahú kedas ho konflitu entre deputadu bnnkada governu no opozisaun.
Deputadu Partidu Libertasaun Populár (PLP), Cornélio Gama 'L7', kestiona linguajen "bosok teen" ne'ebé hato'o husi Deputada FRETILIN, Maria Angélica bainhira halo intervensaun sesaun plenária, iha loron primeiru, Kuarta (15/1).
"Ha'u la gosta dehan ministru bosok-teen, ministru ida ne'ebé", dehan L-7
Nia hatutan, liafuan bosok-teen ne'e tuir L-7 laiha étika morál.
Eis-gerilleiru ne'e sempre nota Partidu FRETILIN nia liafuan durante debate OJE.
Iha fatin hanesan, Deputadu Joaquim dos Santos hatete, konseitu ne'ebé Governu lori mai Parlamentu bainhira sala deputadu labele nonook rona de'it.
"Kuandu sala ne'e ita nonook de'it," dehan Joaquim.
Bainhira liafuan diskursu la hanesan ho lista orsamentu ne'e tenke halo kritika, nune'e deputadu ne'e husu ba bankada governu sira atu esplika termu krítika dehan bosok-teen ne'e iha liafuan ne'ebé di'ak bele rekomenda.
Iha fatin hanesan, Deputada Olinda Guterres reforsa, deputadu sira presiza iha étika morál liuliu linguajen ne'ebé uza perante plenária.
"Ita deputadu sira tenke iha étika morál, ha'u mós la gosta," dehan Olinda.
Nune'e, Depatadu Maria Angélica rekoñese ko'alia liafuan ne'e ho razaun Taur Matan Ruak mai reprezenta governu hanesan primeiru ministru no lejítimu husi AMP, la'os hanesan lider rezidensia, la'os hanesan jenererál.
Deputada ne'e hateten, Taur Matan Ruak tenke reponsabliza OJE ne'ebé Lori mai Parlamentu, nune'e tuir deputada ne'e krítika auto krítika normál akontese hanesan parte kontribusaun atu hadi'a.
Mesmu mosu intervensaun barak maibé situasaun ne'e hapara kedas husi Prezidente Parlamentu Nasionál, Arão Noé de Jesus, hodi kontinua kedas ba debate OJE. (*)