Komadante Komandu PNTL Munisípiu Baukau Superintendente António De Sá hatete, komandu identifika preukupasaun rekursu seguránsa ba tempu kampañia no eleisaun prezidensiál nian no mós rekursu ékipamentus hanesan, radiu beis no trasporte.

Tanba, membru PNTL ne'ebé destaka iha Munisípiu Baukau hamutuk na'in-205, maibé na'in-203 mak ativu enkuantu na'in-2 seluk moras.

"Maibé entre 203 ne'e kuaze balun hetan suspensaun, ativu ne'e pur-volta ema 180 resin de'it, ita ko'alia kona-ba rekursu umanu ba eleisaun prezidensiál nian, ita sei menus rekursu," dehan nia iha salaun enkontru PNTL Baukau, tersa (08/02).

Tanba ne'e komandu PNTL Munisípiu Baukau hato'o ona pedidu ba Komandu Jerál PNTL nian atu haforsa tan seguránsa apoiu ema na'in-110 ba kampañia eleisaun Preidensiál no fó seguránsa ba estasaun votasaun nian, maibé rekursu PNTL enjerál iha teritóriu nasionál hamutuk rihun 4 resin.

"Ita haree ba situasaun eleisaun prezidensiál iha Munisípiu Baukau, ita iha sentru votasaun hamutuk 125, depois estasaun votasaun hamutuk 150, tanba ne'e mak ita ko'alia ba mai liga rekursu umanu ne'e menus tebes," nia afirma

Tuir planu sei monta membru PNTL kada sentru votasaun ne’ebé besik membru na'in-ida, maibé área sentru votasaun ne'ebé iha grau ameasa nian, sei reforsa rekursu seguránsa ema na'in-2 ba leten apoiu mós husi FALINTIL Forsa Defeza Timor-Leste (F-FDTL), tanba tama ona iha planu operasaun nian.

Nune'e mós PNTL sei estabelese liña kordenasaun entre PNTL ho Autoridade lokál sira atu kria ambiente paz no hakmatek.

Komandu PNTL Baukau mós preukupa ba tereñu sentru votasaun balun la asesu estrada no distánsia dook husi estrada no la asesu eletrisidade inklui liña komunikasaun.

"Rádio beis ita estabele iha komandu nian iha, so ke rádio beis ba karreta operasaun eskuadra sira mak balun laiha,"nia afirma

Liga ba infraestrutura uma ba membru Ofisialmentu Polísia Suku (OPS) nian, Munisípiu Baukau iha Suku 59, maibé limitasaun rekursu umanu no finanseiru nune'e seidauk bele rezolve.

"Maske komandu iha ona planu, maibé ida ne'e, ita halo fazeadamente, depende fali ba kondisaun finanseiru," katak nia

Preukupasaun hirak ne'e, Komandu PNTL Munisípiu Baukau sei aprezenta tán ba Komandu Jerál PNTL liuhusi reuniaun ne’ebé sei realiza iha loron 16 fulan-fevreiru tinan-2022.

Maske, minimu rekursu seguránsa, maibé komandu PNTL Munisípiu Baukau sei garante fó seguránsa di'ak ba festa demokrasia nian. (*)