Komandante PNTL Munisípiu Bobonaro, Atonio Mauluta deklara, sidadaun na’in -3 ne’e, membru PNTL kaptura liuhusi servisu vizilánsia iha fronteira terrestre Timor-Leste ho Indonézia.

“Atu informa katak iha loron sábadu iha tuku 6 lorokraik ita-nia membru PNTL husi Eskuadra PNTL Bobonaro, ofisiál polísia komunitária (OPS) Aiasa, OPS Kota Boot, OPS Molop no ajente sekreta UPF servisu konjunta halo patrulla iha área fronteira, hapara kareta truk 3 no konsege kaptura joven mane na’in-tolu iha Suku Gildapil, tanba halo atividade komersiu ilegál ba sigaru ne’ebé hatama liu dalan Ilegál husi Atambua-Indonézia mai Timór-Leste”, dehan Komandante PNTL, Munisipiu Bobonaro, Atonio Mauluta, liuhusi telefone, tersa (25/01).

UPF Kompaña Alfa Tunubibi halo ona identifikasaun ba objetu hirak ne’e no joven sira rekuñese objetu hirak ne’e nia na’in Estanislau husi Suku Gildapil, Aldeia Gildapil. 

“Nune’e atu relata mós naran motorista na’in-tolu ne'e mak hanesan DhB, tinan 24 hela iha Suku Gildapil, Aldeia Atus, xapa matrikula A. 53.459 TL tula sasán iha laran mak hanesan sigaru marka Gudang Garam Surya hamutuk kaixa 7, Tabaku marka Pohon Sagu kaixa 52 ne’ebé falun iha karon laran hamutuk ho kafe ho kulit 36 sakas. Suspeitu ida tan ho naran inisial FjC, tinan 25, husi Suku Gildapil Aldeia Gildapil, xapa matrikula karreta A. 52.099 TL, tula sasán iha karreta laran mak hanesan sigaru marka Gudan Garam Surya kaixa hamutuk 14, Tabaku Pohon Sagu kaixa 10 falun iha karon laran hamutuk ho Kami 26 sakas. Motorista ida ikus naran inisiál TdJ, tinan 30, husi suku Gildapil, Aldeia Gildapil xapa karreta A. 50.704 TL, sasán iha karreta laran mak hanesan sigaru Surya kaixa 19, tabaku Pohon Sagu kaixa 14 no falun iha karon laran hamutuk ho Kami 24 sakas”, informa nia.

Dadaun ne'e suspeitu na’in-3 hamutuk ho evidénsia sira ne’e entrega ona ba Komandu PNTL Munisípiu Bobonaro hodi halo prosesu identifikasaun hodi submete prosesu investigasaun. (*)