Kazu ne’e, akontese tempu kalan iha área Uatulete otél Casa Corres nia oin maizoumenus tuku 10 oras timor-leste.

Sasin ba akontesimentu, Juvinál Guterres haktuir, sira na’in-rua sai husi uma la'o ain atu ba sosa sigaru iha kios, maibé iha dalan derepenti ema deskoiñesidu na’in rua ho motorizada vixion kór mean halai husi diresaun Uatulete mai ho velosidade makas no hasoru sira na’in rua iha dalan mak taa vitíma Rider Mateus da Costa Correira iha parte oin ne’ebé rezulta kanek gravé.

"Ami na’in rua ba kios hola sigaru mak ema aserka taa de'it, ema ne'e sa'e motor halai mohu mak tá, ema na’in rua ho motor vixion lama kór mean", nia konta ba mídia sira iha vítima nia uma Bairo Lopce Tirilolo, tersa (09/11).

Nune’e, família vítima, Pedro Maria eziji, Polísia  Nasionál Timor-Leste (PNTL) Munisípiu Baukau atu buka tuir autór ne’ebé envolve iha kazu ne’e, tanba tenta atu hakotu ema nia vida.

"Ha'u husu ba PNTL Baukau, buka tuir ema ne'e ka'er prosesu la'o ba oin, ne'e krime oho ema, hau eziji", deklara nia.

Hanesan família sente triste ho hahalok ema deskoiñesidu ne'ebé tá vítima, tanba durante vítima nunka mete problema ruma.

Hafoin akontesimentu, família evakua kedas vitíma ba Ospitál Regionál Eduardo Ximenes (HoREX- sígla portugues) Baukau hodi halo tratamentu, maibé kanek grave entaun halo kedas transferensia ba Ospitál Nasionál Guidu Valadáres (HNGV).

"Nia la’o tun mai, nia maun tula ho motór sa'e ba emerjensia, ne'e mak hau tula ha'u nia alin ida mai kesár iha polísia ne'eba, polísia sira sa'e ba, loron baileet sira patrollia tun sa'e, horseik ne'e sira patrollia la iha", informa nia.

Akontesementu ne'e, www.tempotimor.com tenta atu halo konfirmasaun ba segundu komadante PNTL Munisípiu Baukau, maibé seidauk bele fó komentariu ruma. (*)