Xefe operasaun, Inspetór Rogéiro dos Reis hatete, pasa revista ba sidadaun sira ne'ebé ulitiza transporte motór no kareta husi munisípiu Dili mai Baukau depois liuba Vikeké no Lautein, tanba dokumentu balun laiha bele mós sidadaun balun bele lori sasán  kroat.

"Pasa revista ida ne'e ba halo prevensaun loron boot finadu nian ne'ebé monu iha loron 1 no 2, objetivu mós ba sasan kroat nomós ba dokumentu motorizada no kareta ne'ebé halo viajem ba no mai liliu ba loron finadu nian”, dehan Inspetór Rogéiro iha pontu entrada Triloka, sábadu (30/10).

Pasa revista durante loron rua ne'e konsege prende dokumentu motorizada no karreta nian hamutuk 76.

"Pasa revista ba dokumentu karreta no motorizada  nian durante loron rua ne'e konsege prende kareta no motor hamutuk 76 inklui save motor 6 no karreta Estadu ida”, dehan nia.

Pasa revista ne'e mós bele asegura asidente no insidente, tanba motorista sira konduz motorizada no karreta ho velosidade maka'as inklui no pasajeiru sira tuur sa'e to'o kapon leten.

Inspetór ne'e akresenta, meiu pasa revista ne'e mós di'ak tanba bele deteta motór sira ne'ebé lakon, dala barak na'in sira ezije.

Entretantu, pasa revista ne'e hahú horseik no ohin kontinua iha nagardjo, suku Triloka, postu Baukau Vila, ne'ebé dalan diresiona ba vila nova no vila antiga. (*)