“Ami ohin (15/07) halo duni tranferénsia re-afetasaun patrimóniu estadu ba fali iha PNTL. Tribunál Rekursu, tinan ida ne’e iha karreta kuaze 10, mak tama ba prosesu aliñasaun. Bainhira tama ba prosesu aliñasaun, ami identifika katak karreta balu ninia kondisaun sei bele permite atu uza”, dehan Diretór Jerál Tribunal Rekursu (TR), Higino Soares, iha serimónia tranferénsia karreta ba PNTL iha Kaikoli, kinta (15/07).

Tanba nesesidade husi PNTL, nune’e sira halo pedidu ba Tribunál Rekursu hodi halo koordenasaun ho patrimóniu estadu atu identifika karreta ne'ebé mak sei bele halo servisu iha ámbitu PNTL ninia servisu patrullamentu.

“Entaun, ho inspesaun ne'ebé mak patrimóniu estadu sira halo ba karreta 4 ne'e, katak sira rekomenda atubele uza tinan ida to'o tinan rua, hodi halo servisu ita-nia instituisaun PNTL nian iha munisípiu Dili”, hatete nia.

Iha fatin hanesan Diretór Jerál ba Diresaun Jerál Jestaun Patrimóniu Estadu (DJJPE), Januario da Gama hatete, karreta ne'e halo transferénsia karreta unidade 4 ba Komandu Munisípiu Dili, tanba simu pedidu ida husi TR.

“Purtantu, husi ida ne'e, depois de pedidu ne'e tama, diresaun jerál patrimóniu du estadu imediatamente halo koordenasaun kedas ho Tribunál Rekursu hodi halo inspesaun no halo verifikasaun ba kondisaun karreta unidade 4 ne'e para depois bele prosede ba prosesu re-afetasaun karreta husi Tribunál Rekursu ba Polísia Nasionál Timor-Leste”, dehan nia.

Tanba iha dekretu lei, númeru 32/2011, iha artigu 9, estipula kona-ba kondisaun refere, nune'e bainhira iha instituisaun ida surplus item ida ka bens ida, bele halo fali transferénsia ba fali instituisaun seluk ka hanaran re-afetasaun.

“Instituisaun ida la presiza ona, nia afeta kedas fali ba nesesidade instituisaun seluk. Partikularmente, iha parte ida ne’e, instituisaun PNTL mak hanesan benefisiáriu ida husi reafetasaun bens ninian. Purtantu, depois de ami halo verifikasaun e inspesaun konjunta, konfirma katak, viatuara hirak ne’e prienxe ona rekezitu atu halo leilaun ka halo aliñasaun”, afirma nia.

Kareta hirak ne'e, doasaun husi Misaun Organizasaun Nasaun Unidas (ONU) nian iha Timor-Leste dezde tinan 2006 ne'ebé uza durante tinan 15 ona.

Nune'e, diresaun jerál jestaun patrimóniu estadu husu ba Komandu PNTL Munisípiu Dili atu utiliza didi'ak karreta unidade 4 ne'e ba tinan rua tan, hodi bele prienxe nesesidade husi instituisaun nian, no husu mós atu halo ona transformasaun husi inventadu husi TR nian ba fali PNTL.

Nune’e mós, Komandante PNTL Munisípiu Dili, Superinte Polísia, João Sacho Pires, agradese ba Tribunál Rekursu ho Diresaun Jerál Jestaun Patrimóniu Estadu, tanba bele entrega ona karreta 4 ba sira hodi halo servisu operasaun durante oras 24 nia laran.

“Lori komandante distritu, ho segudu komandante distritu nia naran, agradese ba Prezidente Tribunál Rekursu tanba, koordena malu ho komandante distritu konaba viatura ninian e aproveita mós agradese ba diretor sira hotu ne'ebé mak tribunál rekursu bele apoia hela viatura haat mai ami, atu nune'e bele fasilita servisu ne'ebé mak iha terrenu”, afirma nia. (*)