Ministru Prezidensia Konsellu Ministru, Fidélis Magalhães fó sai dadus ne’ebé Governu rekolla dadaun iha ema na’in-27 mak lakon vida, iha na’in-8 seidauk konfirmadu no balun ne’ebé lakon sira-nia hela fatin.

“Até agora iha númeru ba sira ne’ebé lakon sira-nia vita hamutuk 27. Aliende na’in 27 lakon sira-nia vida, na’in-8 mós seidauk konfirma. Ne’ebé 27 konfirmadu lakon vida no na’in-8 seidauk konfirmadu”, deklara Fidélis liuhusi konferensia Imprensa iha Palásiu Governu, segunda (05/04).

Maibé, númeru mate iha kapitál Díli até agora konfirmadu hamutuk 13 no família barak mak lakon sira-nia hela fatin, inklui mós sasán.

“Inundasaun iha zona barak iha ita-nia teritóriu, la’ós de’it iha Díli maibé iha Munisípiu sira seluk”, dehan nia.

Haree ba situasaun udan boot ne’ebé akontese durante loron rua hamosu inundasaun iha territóriu laran halo komunidadr barak mak lakon hela fatin inklui mós lakon vida.

Ho akontesimentu ne’e, governu liuhusi Primeiru Ministru, Taur Matan Ruak konvoka reiuniaun entre ministerial hodi bele haree no responde situasaun sira ne’ebé akontese hanesan inundasaun iha territóriu tomak.

“Iha enkontru ne’e atu haree pontu prinsipál sira ba situasaun ne’ebé mak akontese”, afirma Fidélis. (*)