“Ohin dader ita nia membru hosi setór operasionál halo monitorizasaun ba iha RAEOA no konsege hetan sidadaun estranjeiru hosi Indonezia hamutuk 38 ne’ebe servisu ba kompañia Waskita Karya hodi halo konstrusaun ba obra estrada iha área ponte Noefefan no mos sidadaun Xinez na’in 4 feto na’in-2 no mane na’in-2 servisu iha loja”, dehan Luis Barreto, iha kna’ar fatin Ministériu Interior, Vila-Verde, kinta (09/03).

Nune’e ekipa operasaun asegura kedas sidadaun estranjenjeiru na’in 42, tanba tuir lei migrasaun no azilu númeru 11/2017, katak “Ba ema estranjeiru ne’ebé hakarak tama ka hela temporariamente hodi halo atividade turizmu, negósiu no vizita família ruma, lei lafo dalan atu halo servisu iha Timor-Leste”, nia esplika

 Sidadaun 42 ne’e uza vistu turista hodi halo servisu konstrusaun fíziku iha Suku Lifau, Sub Rejiaun Pante Makasar, Rejiaun Administrativa Espesiál Oekusse Ambenu (RAEOA).

Nia afirma, lei fó kompetensia ba servisu migrasaun hodi halo nia funsaun atu nafatin halo fiskalizasaun no monitorizasaun ba sidadaun estranjeiru sira hahú husi ema ne’e tama mai teritoriu nasionál to’o nia fila ba nia rai.

“Realidade hatudu katak, ema estranjeiru sira komesa hala’o nafatin atividade profisionál la ho autorizasaun, entaun aproveita biban ida ne’e hakarak alerta ba kompañia nasionál no internasionál sira iha teritoriu nasionál tomak, tenki trata traballadór sira nia vistu servisu nian uluk lai, tanba lei la fó dalan atu sira uza vistu turista halo servisu iha Timor-Leste”, nia afirma.

Husu ba kompañia hotu liu-liu ba sira ne’ebe fó servisu ba ema estranjeiru iha área rurál katak, hakarak ema servisu ba sira nia kompaña karik, tenki trata ema nia vistu servisu nian uluk lai se husik hela de’it ne’e kontra lei migrasaun nian.

Servisu migrasaun liu husi setór operasaun sei kontinua nafatin halao’o operasaun ba sidadaun estrajeiru uza vistu turista ne’ebé tama iha teritóriu nasionál hodi halo atividade professional sein atutorizasaun. (*)