“Tinan barak ami haree postu ne’e kondisaun ladi’ak, ami husu membru sira hato’o preokupasaun barak, tantu hela fatin no kondisaun uma, entaun ami koordena ho Governu atu halo fatin ne’e, tanba ne’e mós postu ida iha Oésilo, depois ilegál tama sai barak liuhusi zona ida-ne’e, entaun sira husu beibeik mai autoridade, ha’u ko’alia ho vise-ministru interiór, dehan husik ami apoiu halo de’it ona”, dehan Arsénio Bano hafoin akompaña Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hodi ba hala’o vizita ofisiál ba Konstrusaun edifisiu postu UPF Fatubasin, kuarta (20/07).
Tuir relatóriu ne'ebé mak fó sai husi autoridade RAEOA katak Konstrusaun refere hala’o husi empreza lokál Neno Unipesoál, Lda, bazeia ba númeru kontratu, RAEOA-ZEESM TL SRF/UAL/2021-040, ho montante orsamentu hamutuk rihun US$144-resin.
Nune'e progressu fiziku husi konstrusaun edifísiu refere hahú husi loron 19 fulan-novembru 2021, to'o ohin loron atinje ona pursentu ualunolu-resin-hitu (87%).
Maske konstrusaun ba edifisiu ida ne’e, loloos kompeténsia husi Ministériu Interiór, maibé hein prosesu sei la’o kleur, entaun autoridade aloka de'it OJE 2021 husi RAEOA nian ba apoiu konstrui edifísiu ba UPF sira.
Tanba postu UPF Fatubasin ne'e rasik Prezidente Repúblika no Primeiru Ministru anteriór konsege hala'o vizita maibé to'o agora kontinua la hadi’a fatin ne’e, nune’e autoridade ho inisíativa hari’i oinsá bele evita movimetu ilegál iha Oesilo.
Iha ne'e, Autoridade RAOEA mós apoia halo reabilitasaun ba estrada rural iha área Quibiselu, suku Bobometo, sub-rejiaun Oésilo.
Pozisaun Autoridade halo mós reabilitasaun tanba kondisaun estrada asesu ba postu ne’e ho kondisaun nakonu ho tahu de’it.
Dadauk projetu reabilitasaun estrada ne'e empreza lokál Bannila Unipesoál, Lda máka ezekuta hela, iha ne'ebé dadaun ne'e konsege atinje pursentu ualu-nulu (80%).
Orsamentu ba reabilitasaun ne'e rasik Autoridade prevee ho montante rihun US$291 resin, husi Orsamentu Jerál Estadu (OJE) ne'ebé mak aloka ba RAOEA iha tinan-2021.
Ministru ba Asuntu Parlamentár no Komunikasaun sosiál (MAPKomS), Fransisco Martins Jerónimo hatete, nia parte lori Governu Sentrál nia naran hakarak hato'o parabéns ba Prezidente Autoridade RAEOA ho nia estrutura tomak, tanba nu’udar Oekussioan iha fuan no hanoin hakarak dezenvolve nia rai rasik.
Tanba tempu uluk mai iha ne'e buat barak seidauk di'ak maibé ohin loron mai fali iha suku Malelat, iha ona estrada foun liga Pássabe to’o Nítibe iha liña fronteira.
Nune'e mós iha klínika foun no bee-moos, ahi-lakan oras 24 nia laran, ida-ne’e pasu boot tanba dezenvolvimentu la’o iha-ne’e, liliu halo estrada ne’e ba komunidade atu sai husi izolamentu liga ba sidade, atu nune’e bele sai dalan alternativu ba komunidade nia nesesidade. (*)
