Xefe Suku Gariuia, Arlindo Belo Freitas haktuir, grupu deskoiñesidu ne'e tuda karreta diresaun Dili ba Vikeke iha suku Gariuai pur-volta tuku 12:00 kalan, rezulta vidru jañela karreta parte loos rahun, tanba tuda.

"Akontese ne'e hodikalan maizumenus tuku 12:00, ema sira halo hanesan ne'e planeia ruma karik, la'ós dezentendimentu ruma, la'ós problema ruma, maibé akontesementu hodikalan ne'e, to'o agora ha'u buka tuir mais la identifika, katak ema ne'e sé," dehan Arlindo ba www.tempotimor.com liuhusi via telefone, Kinta (17/03).

Hafoin akotesimentu, kareta refere kontinua kedas viajem ba munísipiu Vikeke, maibé tuir informasaun ne'ebé nia parte hetan husi parte seguransa Polísia Nasionál Timor-Leste (PNTL) munísipiu Baukau katak, husi akontesementu ne'e pasajeirus ida kanek, tanba vidru rahun mak koa.

"Ema ida mak hetan kanek, tanba tuda vidru, vidru mak kona, maibé la grave ida, kanek baibain,"nia informa.

Autoriedade lokál ne'e husu parte segúransa munísipiu Baukau, atu nafatin halo patrollamentu iha tempu kalan, nune'e bele evita asaun hotu.

Entretantu liga ba situasaun ne'e www.tempotimor.com tenta konfirma ho Komadante PNTL Munísipiu Baukau, Superintendente António De Sá, maibé komandante laiha fatin.(*)