Tuir MAPKomS, média mak hanesan liman ain ema hotu-hotu nian atu fó informasaun hanesan Radio Voz ne'ebé espesialidade halai liu bá propagasaun Kristaun nian no karik iha atividade sira seluk mós ne'ebé hakarak fó hato'o mós liuhusi notísia ne'ebé atuál ba povu.

"Durante MAPKomS ba vizita iha média barak ona no ohin iha Radio Voz problema ne'ebé MAPKomS haree média sira la'o hela ho kbiit ne'ebé sira iha, maibé iha buat lubuk ida ne'ebé presiza atu hadi'a tan," dehan ministru, iha Radio Voz, Kinta (23/7).

Ministru hatutan, husi vizita kortezia Iha média Timor-Leste fó hanoin fali atu haree hamutuk problema hirak ne'ebé média hasoru atu rezolve no fó solusaun.

"Nota husi MAPKomS durante halo vizita kortezia iha média sira iha Timor-Leste haree katak média hotu-hotu iha vontade kontribui bá dezenvolvimentu média lokál no média nasionál no internasionál,” dehan nia.

Depois haree hotu problema sira ne'e, MAPKomS iha polítika subvensaun publika ne'ebé atu haruka ba radio hotu atu sustenta sira to'o bele la'o mesak ona.

"Radio komunidade ne'ebé iha ami sei fó subvensaun ba sira atu sira eziste moris la'o nafatin ho kondisaun ida katak bainhira uza ona osan Estadu nian ita tenke hatene halo relatóriu ezekuta atividade, ita labele hanoin de'it gasta maibé tenke hatene gasta ba atividade saida no tenke iha relatóriu mesalmente," nia dehan.

Husi vizita kortezia iha Radio Voz, MAPKomS apelu ba jornalista sira hotu katak fó informasaun ne'ebé kredivel, informasaun tenki kualidade la inventa.

Iha fatin hanesan, Diretór Radio Voz sente ondradu tebes tanba antes ne'e tinan 17 ona sira nunka simu vizita husi na’i ulun sira. Tanba ne'e, sira sente haksolok no ondra boot ba apoiu no boa vontade ba liafuan husi MAPKomS.

"Radio Voz nu'udar kristaun ami Iha prinsípiu katak sira ne'ebé sai ministru tanba simu Knaar husi Maromak no ami husu ba Maromak atu tulun sira ho orasaun," dehan nia. (*)