Iha vizita ne'e, ministru deklara la'ós atu fahe osan ba média sira, maibé atu hamutuk hodi buka solusaun ba dezenvolvimentu média iha Timor-Leste.

"Ha'u-nia prezensa iha ne'e koopera ho imi servisu hamutuk ho ita boot sira hodi buka dalan hamutuk para fó solusaun ba problema sira ne'ebé ita boot sira hasoru. Ha'u labele mai halo lei ida atu fahe osan ba ita boot sira, see ha'u fahe osan ba ita boot sira ema dehan ministru sosa jornalista sira labele ko'alia buat ne'ebé la loos maibé ko'alia buat di'ak de'it", dehan Ministru Jerónimo, iha redasaun Timor Post, Bebora, Kinta (9/7).

Nune'e, prezensa ne'e atu aprezenta aan nu'udar membru governu ida ne'ebé tutela ba iha asuntu komunikasaun no asuntu Parlamentár.

Ministru dehan, iha kometimentu ne'e hakarak atu hakbesik bá média sira hodi ko'alia no rona média sira kona-ba sira-nia hakarak no governu mós iha nia hakarak atu hamutuk informasaun sira ne'ebé la'ós kuantidade de'it maibé iha kualidade no kredivel.

Iha fatin hanesan, Diretora Timor Post, Santina Araujo hateten, Timor Post redús númeru traballadór tanba krize polítika ne'ebé la'o naruk hodi fó impaktu mós ba situasaun ekonomia rai-laran. (*)